काठमाडौं (हाम्रो खेलकुद) – विभागीय त्रिभुवन आर्मी क्लबले राजधानीमा जारी पाँचौ संस्करणको आरबीबी एनभिए कप राष्ट्रिय महिला तथा पुरुष क्लब लिग भलिबल च्याम्पियनसिपको पुरुषतर्फ नेपाल एपिएफ क्लबलाई सोझो सेटमा पराजित गरेको छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा सोमबार भएको विभागीय डर्वी भिडन्तमा एपिएफलाई २५–१५, २५–१८ र २८–२६ सोझो सेटमा पराजित गरेको हो । सुरुवाती दुई सेटमा सहज जित निकालेको आर्मीले तेस्रो सेटमा पछि परेको अवस्थामा उत्कृष्ट प्रदर्शन गर्दै जित निकाल्न सफल भएको हो ।

एपिएफले लिगमा पहिलो हार बेहोरेको हो । जितसँगै आर्मीको ४ खेलबाट ९ अंक पुगेको छ । एपिएफको पनि ९ अंक छ । शीर्षस्थानमा रहेको टिप टप हेल्प नेपालको १२ अंक छ ।

२६ चैतसम्म हुने प्रतियोगितामा पुरुषतर्फ ७ तथा महिलातर्फ ६ टोलीको सहभागिता छ । लिगपछि शीर्ष दुई टोलीले उपाधिका लागि प्रतिस्पर्धा गर्नेछ । लिग अवधिभर खेलाडी र अफिसियलको बिमा गरिने संघले जनाएको छ ।

प्रतियोगिताको पुरुष र महिला दुवैतर्फको विजेताले ३ लाख रुपैयाँ हात पार्नेछन् । दोस्रो हुनेले १ लाख ७५ हजार, तेस्रोले ७५ हजार तथा चौथो हुने टोलीले ३७ हजार ५ सय प्राप्त गर्नेछन् । प्रतियोगिताको सर्वोत्कृष्ट पुरुष र महिला खेलाडीले समान २५–२५ हजार प्राप्त गर्नेछन् । व्यक्तिगत विधाका उत्कृष्ट लिवेरो, स्पाइकर, ब्लकर, सर्भर, सेटर र प्रशिक्षकले जनही १०–१० हजार हात पार्नेछन् ।