काठमाडौं (हाम्रो खेलकुद) – विभागीय त्रिभुवन आर्मी क्लबलाई हराउँदै नेपाल एपिएफ क्लबले राजधानीमा जारी पाँचौ संस्करणको आरबीबी एनभिए कप राष्ट्रिय महिला तथा पुरुष क्लब लिग भलिबल च्याम्पियनसिपको महिलातर्फको फाइनल पुग्ने सम्भावनालाई जीवितै राखेको छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा सोमबार भएको खेलमा एपिएफले आर्मीलाई ३–१ को सेटमा पराजित गरेको हो । एपिएफले शुरुवाती सेट गुमाएपनि त्यसपछिको तीन सेट आफ्नो पक्षमा पार्दै लिगमा दोस्रो जित दर्ता गरेको हो ।

एपिएफले पहिलो सेट १९–२५ ले गुमाएको थियो । दोस्रो सेटमा २५–१० को सहज जित हात पारेको एपिएफले तेस्रो सेट २५–१७ ले आफ्नो पक्षमा पारेको थियो । प्रतिस्पर्धात्मक चोथो सेटमा एपिएफ २५–२२ ले विजयी हुन सफल भयो ।

लिगमा आर्मीको यो पहिलो हार हो । आर्मीले यसअघि होङ्गान्जी न्यु डायमन्ड र ढोरपाटनलाई पराजित गरेको थियो । एपिएफको यो दोस्रो जित हो । पहिलो खेलमा ढोरपाटनलाई हराएको एपिएफ दोस्रो खेलमा पुलिससँग ३–२ को सेटमा पराजित भएको थियो ।

यसअघि सोमबार भएको पहिलो खेलमा भरतपुरले ढोरपाटन स्पोर्ट्स क्लबलाई ३–० को सोझो सेटमा हराउँदै लिगमा पहिलो जित निकालेको थियो । एकपक्षीय खेलमा भरतपुरले ढोरपाटनमाथि २५–२१, २५–१२ र २५-१३ को सहज जित निकाल्यो ।

यो जितपछि एपिएफको ३ खेलबाट ७ अंक पुगेको छ । चार खेल खेलेको आर्मीको ८ अंक छ । पुलिसको पनि ८ अंक नै छ । होङ्गान्जी न्यु डायमन्डको ७ अंक छ । लिगमा पहिलो जितसँगै भरतपुरले ४ खेलबाट ३ अंक जोडेको छ । ढोरपाटनले ५ खेल खेल्दा अंकको खाता खोल्न सकेको छैन ।

लिगमा सोमबार पुरुषतर्फ हेल्प नेपाल र पुलिस, एपिएफ र आर्मी तथा मणि मुकुन्द र नयाँबजारबीच प्रतिस्पर्धा हुनेछ । २६ चैतसम्म हुने प्रतियोगितामा पुरुषतर्फ ७ तथा महिलातर्फ ६ टोलीको सहभागिता छ । लिगपछि शीर्ष दुई टोलीले उपाधिका लागि प्रतिस्पर्धा गर्नेछ । लिग अवधिभर खेलाडी र अफिसियलको बिमा गरिने संघले जनाएको छ ।

प्रतियोगिताको पुरुष र महिला दुवैतर्फको विजेताले ३ लाख रुपैयाँ हात पार्नेछन् । दोस्रो हुनेले १ लाख ७५ हजार, तेस्रोले ७५ हजार तथा चौथो हुने टोलीले ३७ हजार ५ सय प्राप्त गर्नेछन् । प्रतियोगिताको सर्वोत्कृष्ट पुरुष र महिला खेलाडीले समान २५–२५ हजार प्राप्त गर्नेछन् । व्यक्तिगत विधाका उत्कृष्ट लिवेरो, स्पाइकर, ब्लकर, सर्भर, सेटर र प्रशिक्षकले जनही १०–१० हजार रहात पार्नेछन् ।