काठमाडौं (हाम्रो खेलकुद) – दाङका सुदिन श्रेष्ठले प्रथम सुर्यदर्शन जुनियर यु–१३ ब्वाइज सिंगल्सको उपाधि जितेका छन् । सुदेनले आफ्नै जिल्लाका अरुण अधिकारीलाई पराजित गर्दै उपाधि जितेका हुन् ।

टोखास्थित सुर्यदर्शन ब्याडमिन्टन कोर्टमा शनिबार भएको फाइनलमा सुदिनले पहिलो सेट १८–२१ ले गुमाएपनि त्यसपछिको दुवै सेट जित्दै उपाधि जित्न सफल भएका हुन् । सुदिनले दोस्रो सेट २१–१२ र २१–१४ ले आफ्नो पक्षमा पारेको थियो ।

त्यसअघि शनिबारै भएको सेमिफाइनलमा सुदिनले जेस्ट ब्याडमिन्टन एकेडेमीका जितेन महतालाई २१–७ र २१–७ ले तथा सुर्याेदय बोर्डिङ स्कुलका अमन डंगोलललाई १५–७ र १५–५ को सेटमा पराजित गर्दै अन्तिम चारको यात्रा तय गरेका हुन् । दाङका अरुण अधिकारीले सुर्याेदयका सक्षम रानालाई २१–१२ र २१–१६ ले पराजित गर्दै फाइनलमा स्थान बनाएका थिए ।

योनेक्स सनराइजका नेपालका लागि आधिकारिक बिक्रेता (इनास इन्टरप्राइजेज) का प्रवन्ध निर्देशक राजु बास्तोलाले प्रतियोगिताको फाइनल खेल्ने दुई जनालाई योनेक्सको ¥याकेट र टिसर्ट उपहार दिनुका साथै सेमिफाइनलमा पुगेका चार जनालाई वर्षभरि खेल्न पुग्ने योनेक्सको खेल सामग्री उपलब्ध गराउने घोषणा गरेको छ ।

दुई दिने प्रतियोगितामा ४५ जना जुनियर खेलाडीहरुले सहभागिता जनाएका थिए । सुर्यदर्शन ब्याडमिन्टन कोर्टका अध्यक्ष शिवराज डंगोलले नयाँ प्रतिभावान खेलाडी निकाल्ने उद्देश्यले यु–१३ को प्रतियोगिता आयोजना गरिएको बताए ।