काठमाडौं (हाम्रो खेलकुद) – विभागीय नेपाल पुलिस क्लबले पाँचौ संस्करणको आरबीबी एनभिए कप राष्ट्रिय महिला तथा पुरुष क्लब लिग भलिबल च्याम्पियनसिपको महिलातर्फ नेपाल एपिएफ क्लबमाथि ३–२ को पूनरागमन जित निकालेको छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा शनिबार भएको प्रतिस्पर्धात्मक खेलमा पुलिसले दुई सेटले पछि परेको अवस्था उल्ट्याउदै ३–२ को पूनरागमन जित हात पारेको हो ।

लिगमा एपिएफको यो पहिलो हार हो । यसअघि एपिएफले पहिलो खेलमा ढोरपाटनलाई ३–० को सोझो सेटमा पराजित गरेको थियो । पुलिसको भने यो लगातार दोस्रो जित हो । पुलिसले पहिलो खेलमा भरतपुरलाई ३–० को सोझो सेटमा पराजित गरेको थियो ।

पुलिसले पहिलो र दोस्रो सेट क्रमश २०–२५ र २८–३० ले गुमाएको थियो । पुलिस दोस्रो सेटमा जित नजिक पुगेर पनि जितबाट बञ्चित बनेको थियो । तर, त्यसपछि उत्कृष्ट प्रदर्शन गरेको पुलिसले तेस्रो सेट २५–२३ ले आफ्नो पक्षमा पार्दै खेलमा फर्कने संकेत दिएका थिए । एक समय ६ अंकको अग्रता लिएपनि पुलिसले अंक गुमाउदा दवावमा परेपनि तेस्रो सेट जित्न सफल भएको थियो ।

चौथो सेटमा उच्च प्रदर्शन गरेको पुलिसले २५–१९ ले सेट आफ्नो पक्षमा पार्दै खेललाई २–२ को बराबरीमा ल्याएका थिए । सुरुवाती समयमा पछि रहेको पुलिसले एपिएफलाई १८–१८ को बराबरीमा रोक्दै लगातार ५ अंक जोड्दै जित नजिक पुगेको थियो । त्यसपछि एपिएफले १ अंक मात्रै जोड्दा पुलिसले २ अंक जोडेको थियो ।

चौथो सेटमा उषा भण्डारी, कामना विष्ट, कोपिला राना, कमला पुन, र मनिषा चौधरीले उच्च प्रदर्शन गरेकी थिइन् । निर्णायक सेटमा सुरुवातमा पछि परेपनि पुलिसले पूनरागमन गर्दै १५–११ ले खेल आफ्नो पक्षमा पार्दै एपिएफलाई पराजित गर्न सफल भयो ।

यो जितसँगै पुलिसले फागुन अन्तिम साता नेपालगन्जमा सम्पन्न सातौ संस्करणको प्रधानमन्त्रीकपको फाइनलमा बेहोरेको हारको बदला लिन सफल भएको छ । यो जितपछि पुलिसको २ खेलबाट ५ अंक पुगेको छ । पराजित एपिएफको २ खेलबाट ४ अंक रहेको छ ।