काठमाडौं (हाम्रो खेलकुद) – नेपाली पारा ब्याडमिन्टन खेलाडी प्रकाश अधिकारीले दुवईमा सञ्चालन भइरहेको तेस्रो फाजा–दुवई पारा ब्याडमिन्टन इन्टरनेसनल २०२१ अन्तरगतको पुरुष एकलमा दोस्रो हार बेहोरेको छ ।

सवाव अल एली दुवई क्लबमा बुधबार भएको पुरुष एकलको एसएल ४ समूहको खेलमा प्रकाश पोर्चुगलका डिएगो ड्यानियलसँग २–१ को सेटमा पराजित भएको हो । मंगलबार मलेसियाका मोहम्मद जुलफातीहि जफ्फरसँग २–० को सोझो सेटमा पराजित भएको खेलमा चोट बोकेका प्रकाशले बुधबार डिएगो ड्यानियलसँग २१–१६ र २१–६ को हार बेहोरेको हो ।

मेन्स डबल्समा प्रकाश र भारतका गाडेला डिलास्वारको जोडी भारतका मोहम्मद अरवाज अन्सारी र दिप रन्जन विशोयीको जोडीसँग १२–२१, २१–१९ र १५–२१ को सेटमा पराजित भए । अब प्रकाशले पुरुष एकलमा लिग चरणको अन्तिम खेलमा प्रतियोगितामा छैटौ वरियता पाएका रसियाका पाभेल कुल्लिकोभसँग प्रतिस्पर्धा गर्दैछ । पुरुष डबल्समा प्रकाशले भारतका गाडेला डिलास्वारसँग मिलेर भारतका सुकान्त कादम र नितेश कुमारको जोडीसँग खेल्नेछ ।

पहिलोपटक पारा ब्याडमिन्टनमा सहभागी भएको युवा खेलाडी भनेर आज ब्याडमिन्टन वल्ड फेडेरेसनका मिडिया टोलीले प्रकाशको विशेष अन्तरवार्ता लिएको दुवईबाट नेपाल ब्याडमिन्टन कम्युनिटीका संयोजक तथा प्रतियोगिताका अम्पायर हिरालाल श्रेष्ठले जानकारी गराए ।

प्रकाश नेपालबाट प्रतियोगिता खेल्न एक्लै दुवई पुगेपनि उनलाई त्यहाँ नेपाल ब्याडमिन्टन कम्युनिटी दुवई परिवारले साथ दिएका छन् । पारा ब्याडमिन्टनमा नेपालको यो पहिलो सहभागिता हो । तेस्रो फाजा–दुवई पारा ब्याडमिन्टन इन्टरनेसनल २७ मार्चदेखि ५ अप्रिल २०२१ सम्म सवाव अल एली दुवई क्लबमा हुनेछ ।