एजेन्सी – इन्डियन प्रिमियर लिग (आइपिएल) १४ औं संस्करणमा दिल्ली क्यापिटल्सको कप्तानी विकेटकिपर ब्याट्सम्यान ऋषभ पन्तले गर्ने भएका छन् ।

आइपिएल अप्रिल ९ देखि सुरु हुँदै छ । नियमित कप्तान श्रेयस ऐर चोटका आगमी आइपिएल गुमाउने भएपछि दिल्लीले उपकप्तान ऋषभ पन्तलाई कप्तानको जिम्मेवारी दिएको छ । दिल्लीको कप्तानको दाबेदारमा पन्तसँगै अष्ट्रेलिया पूर्वकप्तान स्टिभ स्मिथ, भारतीय ब्याट्सम्यान अजिक्या रहाने, शिखर धवन र रविचन्द्रन आश्विन थिए ।

ऐरले सन् २०१८ मा दिल्लीको कप्तानी समालेका थिए । नियमित कप्तान गौतम गम्भिरको कप्तानीमा दिल्लीले खराब प्रदर्शन गरेपछि श्रेयसलाई कप्तानको जिम्मेवारी दिएको थियो । श्रेयस ऐरको कप्तानीमा दिल्लीले सन् २०२० मा पहिलो पटक आइपिएलको फाइनलमा स्थान बनाउँदै इतिहास रचेको थियो । श्रेयसले आफ्नो कप्तानीमा २०१९ मा प्ले अफ सम्म पुर्याएका थिए । यस सिजनको आइपिएलमा दिल्ली उपाधिको प्रमुख दाबेदार टोली मध्य एक पर्दछ । पन्त दिल्लीको १३ औं कप्तान हुने छन् ।

गत मंगलबार इंल्यान्डविरुद्ध पहिलो ओडिआई खेलमा फिल्डिङको क्रममा ऐरको बायाँ हातको काँधमा चोट लागेको थियो । तीव्र गतिका बलर शार्दूल ठाकुरको आठौं ओभरको चौथो बलमा जोनी बेयरस्टोले प्रहार गरेको शट कभरमा रोक्ने क्रममा डाइभ मार्नेक्रममा ऐरको बायाँ काँधमा चोट लागेको थियो । आइपिएलमा दिल्लीले पहिलो खेल अप्रिल १० मा चेन्नई सुपर किंग्ससँग खेल्दै सुरुवात गर्ने छ ।