काठमाडौं (हाम्रो खेलकुद) – नेपाली राष्ट्रिय क्रिकेट टोलीका मुख्य प्रशिक्षक देभ ह्वाटमोरको सातै प्रदेश जाने कार्यक्रम तत्कालको लागि स्थगित भएको छ ।

वैशाख पहिलो सातादेखि काठमाडौंमा सुरु हुने नेपाल, मलेसिया र नेदरल्याड्सबीच हुने टि२० सिरिजको कारण तत्कालको लागि स्थगित भएको नेपाल क्रिकेट संघ (क्यान) ले जनाएको छ । क्यान र राष्ट्रिय खेलकुद परिषद् (राखेप) को कार्यक्रममा ह्वाटमोर सातै प्रदेशका प्रशिक्षक र खेलाडीलाई हेर्न जाने कार्यक्रम थियो । एक प्रदेशमा बढीमा ४ दिन बस्ने कार्यक्रम थियो । दुई दिन त्यहाँका प्रशिक्षकसँग कुराकानी गर्नुको साथै जानकारी लिने कार्यक्रम थियो । दुई दिन खेलाडीसँग सेसन हुने कार्यक्रम थियो । लेभन, वान, टु र थ्री लगायतका सबै प्रदेशका प्रशिक्षकलाई एजुकेट गर्ने कार्यक्रम रहेको थियो ।

जस अन्तर्गत प्रदेश १ मा बुधबारबाट सुरु भएर शनिवार सम्पन्न भई सकेको थियो । कीर्तिपुर मैदानमा नेपाल, नेदरल्यान्ड्स र मलेसियाबीच वैशाख ४ देखि ११ सम्म (१७ अप्रिल देखि २४ सम्म) त्रिकोणात्मक सिरिज हुँदै छ । सिरिज डबल राउन्ड रोविनको आधारमा हुने छ । शीर्षदुई टोली फाइनलमा उपाधिको लागि भिड्ने छन् । ह्वाटमोरले अव सिनियर टोलीका खेलाडीलाई बोलाएर प्रशिक्षण थाल्ने छन् ।