काठमाडौं (हाम्रो खेलकुद) – जापानमा आयोजना हुने टोकियो ओलम्पिक २०२१ को तयारीमा रहेका एथलेटिक्सका गोपिचन्द्र पार्कीलाई नेपाल ओलम्पिक कमिटि (एनओसी) ले शुक्रबार खेल सामग्री प्रदान गरिएको छ ।

नेपाल ओलम्पिक कमिटिले शुक्रबार ओलम्पिकको तयारीमा रहेका म्याराथन धावक पार्कीलाई खेल सामग्री प्रदान गरेको हो । कमिटिका अध्यक्ष जीवनराम श्रेष्ठले पार्कीलाई ट्रेनिङ गर्दा प्रयोग हुने जुत्ता, रनिङ स्पाइक र प्रतिस्पर्धा गर्दा प्रयोग हुने जुत्ता लगायतका सामग्री प्रदान गरे ।

पार्की नेपालबाट जापान ओलम्पिक खेल्नका लागि पक्का भएका एक्लो खेलाडी हुन् । कार्यक्रममा बोल्दै अध्यक्ष श्रेष्ठले ओलम्पिकमा पार्कीले बैकुण्ठ मानन्धरको कीर्तिमान भंग गर्नेमा आफु विश्वस्त रहेको बताए ।

पार्की गत मंसिरमा नेपालगन्जमा भएको ओलम्पिक छनोटको रुपमा रहेको छैटौं नेपालगन्ज म्याराथनको च्याम्पियन बन्दै ओलम्पिकमा छनोट हुन सफल भएको थियो । अध्यक्ष श्रेष्ठले खेलाडी र प्रशिक्षक सन्तोष श्रेष्ठलाई बधाई दिदै एनओसीले होकाइदोमा तीन महिनाको लागि प्रशिक्षणको वातावरण मिलाउने योजनामा रहेको बताए ।

कार्यक्रममा एनओसीका महासचिप निलेन्द्रराज श्रेष्ठ, उपाध्यक्ष ज्योति राणा, अशोक बज्राचार्य, चतुरानन्द राज वैद्य, सदस्य गोपाल सुन्दर लाल कक्षपति र रमेश प्रसादा शिवाकोटीको उपस्थिति रहेको थियो ।