काठमाडौं (हाम्रो खेलकुद) – नेपाल ब्याडमिन्टन संघको आयोजनमा हुने योनेक्स सनराईज एनबिए कप राष्ट्रिय ब्याडमिन्टन च्याम्पियनसिप बैशाख पहिलो साता आयोजना हुने भएको छ ।

यसअघि १५ देखि १८ चैतसम्म आयोजना हुने भनिएको च्याम्पियनसिप अब ४ देखि ८ बैशाखसम्म हुने संघका अध्यक्ष रामजी बहादुर श्रेष्ठले जानकारी गराएका छन् । दशरथ रंगशालास्थित कभर्डहलमा आयोजना हुने च्याम्पियनसिपमा पुरुष तथा महिला एकल र युगल, मिश्रीत युगल, ब्वाईज तथा गल्र्स यु–१७ र भेट्रान्स युगल ४५ गरि ८ विधामा प्रतिस्पर्धा हुने नेपाल ब्याडमिन्टन संघले जनाएको छ ।

र्‍याङकिङ प्रतियोगिता समेत रहेको च्याम्पियनसिपमा देशभरका खेलाडीले सहभागिता लिन पाउनेछन् । करिब २७ लाखको अनुमानित बजेट रहेको च्याम्पियनसिपमा पुरुष तथा महिला एकलका शीर्ष तीन बिजेताले नगद ५० हजार, २५ हजार र १२ हजार ५ सय रुपैयाँ प्राप्त गर्नेछन् ।

युगलतर्फ शीर्ष तीनले नगद ३० हजार, १५ हजार र ७ हजार ५ सय यु – १७ ब्वाईज तथा गल्र्सका शीर्ष तीन बिजयीले नगद २० हजार, १० हजार र ५ हजार रुपैया प्राप्त गर्नेछन् । बिश्व ब्याडमिन्टन महासंघको नियमानुसार खेलाईने च्याम्पियनसिपका लागि प्रत्येक जिल्लालाई पुरुष तथा महिला शिर्ष १६ बरियता बाहेक २ पुरुष र २ महिला कोटा प्रदान गरिएको छ ।