काठमाडौं (हाम्रो खेलकुद) – आयोजक अशिम युथ क्लबको रातो टोली प्रथम साराङ्गे छहारी कप पुरुष भलिबल प्रतियोगिताको च्याम्पियन बनेको छ ।

नयाँ बसपार्कस्थित ढोरपाटन स्पोर्ट्स क्लबको खेल मैदानमा सोमबार फाइनलमा गल्कोट बाग्लुङलाई ३–१ को सेटमा पराजित गर्दै आयोजक रातोले उपाधि जितेको हो । प्रतिस्पर्धात्मक पहिलो सेट ३७–३९ ले गुमाएपनि त्यसपछिको तीनै सेट आयोजकले आफ्नो पक्षमा पार्न सफल भएको थियो । दोस्रो सेट २६–२४ ले आफ्नो पक्षमा पार्दै खेलमा फर्र्किएको आयोजक अशिमले त्यसपछिको दुई सेट २५–२३ र २५–१९ ले आफ्नो पक्षमा पारेको थियो ।

उपाधिसँगै आयोजक अशिमले १ लाख १ हजार १ सय ११ रुपैयाँ प्राप्त गरेको छ । उपविजेता बनेको गल्कोटले ६१ हजार १ सय ११ रुपैयाँ हात पारेको छ । न्युटनलाई हराएर तेस्रो भएको मणिमुकुन्द भलिबल क्लबले ३१ हजार १ सय ११ रुपैयाँ प्राप्त गर्‍यो ।

व्यक्तिगत विधामा आयोजक अशिमकै खेलाडीको वर्चस्व रह्यो । मिलन चन्द ठकुरी प्रतियोगिताको सर्वोत्कृष्ट खेलाडी चुनिए । उनले ५ हजार नगद प्राप्त गरे । उत्कृष्ट प्रशिक्षक चुनिएका अशिमका अमृत केसीले ३ हजार प्राप्त गरे ।

अशिमका विवस आले सेटर, हिमाल मगर क्विकर र बिशाल ठकुरी उत्कृष्ट ब्लकर चुनिए । गल्कोट बाग्लुङका प्रकाश सुनार स्पाइकर, मणिमुकुन्दका जीवन रसाइली डिफेन्डर र न्युटनका नकुल शाही उत्कृष्ट सर्भर चुनिए । उनीहरुले समान २ हजार ५ सय प्राप्त गरे ।

प्रतियोगिताको विजयी टोली तथा खेलाडीलाई नेपाल भलिबल संघका अध्यक्ष मनोरञ्जन रमण शर्मा, क्लबका अध्यक्ष लोक बिक्रम मल्ल लगायतले पुरस्कृत गरे । अशिम युथ क्लब क्लबको आयोजना ४ चैतबाट शुरु भएको प्रतियोगितामा २० टोलीले लिग कम नकआउटका आधारमा प्रतिस्पर्धा गरेका थिए । प्रतियोगितामा विभाग र प्रदेशबाट प्रतिनिधित्व गरिसकेका खेलाडीले खेलेका थिएनन् ।