ईलाम (हाम्रो खेलकुद) – दोस्रो संस्करणको ईलाम आमन्त्रण खुल्ला पुरुष भलिबल प्रतियोगिता दोस्रो सेमिफाइनलमा आज (शनिबार) विभागीय टोली नेपाल एपिएफ क्लबले भारतीय टोली विमान ट्रेडर्स विर्तामोडसँग खेल्दै छ ।

खेल दिउँसो ३ बजे ठूलो टुडिखेलमा हुने छ । एपिएफ समूह बी को विजेता हो । एपिएफले पहिलो खेलमा नेपाल पुलिस क्लबलाई ३–२ को सेटमा पराजित गरेको थियो । दोस्रो खेलमा दमकलाई ३–० को सोझो सेटमा पराजित गरेको थियो ।

यता भारतीय राष्ट्रिय टोलीका तीन खेलाडी सम्मिलित विमान पहिलो खेलमा आर्मीसँग ३–२ को सेटमा पराजित भएको थियो । दोस्रो खेलमा साविक विजेता गण्डकी प्रदेशलाई ३–० ले पराजित गर्दा अन्तिम खेलमा गौरादह नगर खेलकुद विकास समितिले वाक ओभर दिएको थियो ।

समान ७ अंक भएपनि आर्मी हेड टु हेडका आधारमा शीर्ष र विमान दोस्रो स्थानमा रहँदै सेमिफाइनलमा पुगेका थिए । भारतीय खेलाडीले भरिभराउ विमान बलियो र उपाधिको दाबेदार टोली हो ।

एपिएफमा महेन्द्र श्रेष्ठ, टेकराज अवस्थी, विजय थापा, सुनिल घर्ती, हेमन्त मल्ल, दुर्गा बहादुर सुनार लगायतका खेलाडी छन् । विमानमा भारतीय टोलीका रोहित कुमार, प्रिन्स र सुभम चौधरी छन् ।

सुभम भने गण्डकीको खेलको क्रममा घाइते भएका थिए । उनले खेल्ने सम्भावना कम छ । गौरभ तमोर, शिखर धिमन, विजय सिताराम राजु, रेमन्त चौहान विकाश लगायतका खेलाडी छन् ।

फाइनल आइतबार हुने छ । प्रतियोगिताको विजेताले २ लाख रुपैयाँ प्राप्त गर्नेछन् । दोस्रो हुने टोलीले १ लाख पाउने छन् ।