ईलाम (हाम्रो खेलकुद) – दोस्रो संस्करणको ईलाम आमन्त्रण खुल्ला पुरुष भलिबल प्रतियोगिता पहिलो सेमिफाइनलमा आज (शनिबार) दुई विभागीय टोली त्रिभुवन आर्मी क्लब र नेपाल पुलिस क्लबीच प्रतिस्पर्धा हुँदैछ ।

खेल मध्यान्ह १२ बजे ईलामको ठूलो टुडिखेलमा हुनेछ । राष्ट्रिय खेलाडीले भरिभराउ आर्मी समूह ‘ए’ को विजेता र नेपाल पुलिस समूह ‘बी’ को उपविजेताको रुपमा सेमिफाइनलमा स्थान बनाएका थिए ।

आर्मी ३ खेलमा ३ जितका साथ ७ अंक जोड्दै हेड टु हेडको आधारमा शीर्षस्थानमा रहँदै सेमिफाइनल पुगेको हो । आर्मीले लिगर चरणको पहिलो खेलमा विमान ट्रेडर्स विर्तामोडलाई ३–२ ले पराजित गरेको थियो । दोस्रो खेलमा आर्मीले गौरादह नगर खेलकुद विकास समितिलाई ३–२ र लिगको अन्तिम खेलमा साविक विजेता गण्डकी प्रदेशलाई ३–१ ले पराजित गरेको थियो ।

आर्मीमा मानबहादुर श्रेष्ठ, हरिहजुर थापा, दुर्गा बहादुर खड्का, धनबहादुर भट्ट क्षेत्री, राजेन्द्र विष्ट, शरण सामरी क्षेत्री, हरि अधिकारी, ईश्वर थापा, भरव बम, दुर्गा महतो, हृदेश चौधरी लगायतका खेलाडी छन् ।

पुलिस पहिलो खेलमा नेपाल एपिएफ क्लबसँग ३–२ को सेटमा पराजित भएको थियो । दोस्रो खेलमा दमक नगर भलिबल क्लबलाई ३–० को सोझो सेटमा पराजित गर्दै समूह बी को उपविजेता बनेको थियो ।

पुलिसमा राष्ट्रिय भलिबल टोलीका कप्तान इम रानामगर, कुल बहादुर थापा, अनुभवी खेलाडी ध्रुव पौडेल, युवा खेलाडी रविन चन्द, बिशाल बहादुर विक लगायतका खेलाडी छन् । दुई उपाधिका दाबेदार पुलिस र आर्मीबीच कडा प्रतिस्पर्धा हुने अनुमान गरिएको छ ।

पछिल्लो समय यी दुई टोली पोखरामा अघिल्लो महिला सम्पन्न प्रथम टाइगर कपमा एकअर्कासँग खेलेका थिए । लिगमा आर्मीले पुलिसलाई ३–० को सोझो सेटमा पराजित गरेको थियो । पुलिस उक्त हारको बदला लिने सोचमा हुने छ ।

यता प्रथम टाइगर कपको विजेता र साविक विजेता गण्डकीलाई हराउँदै सेमिफाइनलमा स्थान बनाएको आर्मी त्यस्तै नतिजा पुलिसमाथि निकाल्दै फाइनलमा स्थान बनाउन चाहन्छ ।

दोस्रो सेमिफाइनलमा समूह ‘ए’ को उपविजेता विमान ट्रेडर्स विर्तामोड र समूह ‘बी’ को विजेता नेपाल एपिएफ क्लबबीच प्रतिस्पर्धा हुनेछ । फाइनल आइतबार हुने छ । प्रतियोगिताको विजेताले २ लाख तथा दोस्रो हुने टोलीले १ लाख रुपैयाँ हात पार्नेछन् ।