धनगढी (हाम्रो खलकुद)– स्वदेशमा गत वर्ष आयोजना भएको १३ औं दक्षिण एसियाली खेलकुद (साग) मा सर्वाधिक स्वर्ण पदक विजेता पौडीकी गौरिका सिंह र एथलेटिक्सका गोपीचन्द्र पार्की सुदूरपश्चिम स्पोर्टस अवार्डमा वर्षका उत्कृष्ट खेलाडी घोषित भएका छन् ।

नेपाल खेलकुद पत्रकार मञ्च समन्वय शाखा कैलालीको आयोजनामा भएको अवार्डमा गौरिकालाई नोभा अस्पताल बर्ष महिला खेलाडीको अवार्ड प्रदान गरियो । गोपीलाई नवजीवन अस्पताल बर्ष पुरुष खेलाडीबाट सम्मानित भए ।

गौरिकाले १३ औं सागमा ४ स्वर्ण,२ रजत र ३ कास्य जितेकी थिइन् । सागमामा सबैभन्दा बढी ९ पदक जितेर सर्वाधिक पदक जित्ने अर्को कीर्तिमान पनि उनको नाममा छ । गोपीले १३ औं सागमा ५ हजार मिटर दौडमा स्वर्ण पदक जितेका थिए ।

भलिबलकी सरस्वती चौधरी बर्षको लोकप्रिय खेलाडी घोषित भएकी छिन् । सरस्वतीलाई बनदेवी क्लव पिपुल च्वाइस अवार्ड प्रदान गरियो । उनले पौडीकी गौरिका सिंह र क्रिकेटकी अन्जली चन्दलाई पछि पारिन् । सरस्वतीले ४५ दशमलव ९ प्रतिशत भोट पाइन् भने गौरिकाले ४४ दशमलव ८५ र अन्जलीले ९ दशमलव २५ प्रतिशत भोट पाइन् । नेपाली महिला टोलीले गत वर्ष बंगलादेशमा सम्पन्न सेन्ट्रल जोन भलिबलमा स्वर्ण र १३ औं सागमा रजत पदक जित्दा सरस्वती टोलीकी सदस्य थिइन् ।

कुस्तीका राजेन्द्र चन्द बर्ष प्रशिक्षक घोषित भएका छन् । दिनेश सोप बर्ष प्रशिक्षक अवार्ड चन्दलाई प्रदान गरिएको हो । उनको प्रशिक्षणमा १३ औं सागमा कुस्तीले पहिलो पटक स्वर्ण जितेको थियो । चन्द एक स्वर्ण सहित तीन रजत र तीन कास्य गरी सात पदक जिताउने प्रशिक्षक हुन् ।

कैलाली अस्पताल दोस्रो सुदूरपश्चिम स्पोर्टस अवार्डमा एथलेटिक्सका लक्ष्मीदत्त भट्टलाई सारथी अस्पताल लाइफ टाइम एचिभमेन्ट अवार्ड प्रदान गरिएको छ । तीन दशक अघि चार पटक नेपाल च्याम्पियन बनेका एथलेटिक्स खेलाडी तयार पार्ने कैलालीको गेटा निवासी भट्टलाई सम्मानित गरिएको हो ।

१३ औं सागकी दोहोरो स्वर्ण पदक विजेता तेक्वान्दोकी आयशा शाक्य र क्रिकेटकी अन्जली चन्दलाई वर्षको स्पेशल अवार्डबाट सम्मानित भए । दुवैलाई न्यू सिटी पोलीक्लिनिक स्पेशल अवार्ड प्रदान गरिएको हो । अन्जलीले १३ औं साग अन्तर्गत महिला क्रिकेटमा नेपालले माल्दिभ्समाथि १० विकेटको जित हात पार्दा कीर्तिमानी बलिङ गरेकी थिईन् । उनले ह्याट्रिक सहित कुनै रन नदिएर ६ विकेट लिएकी थिइन् ।

त्यस्तै कुस्तीकी संगिता धामी निसर्ग अस्पताल बर्ष युवा खेलाडी घोषित भइन् । उनले १३ औं सागमा कुस्तीमा स्वर्ण पदक जितेकी थिइन् । नेपाललाई कुस्तीमा स्वर्ण पदक दिलाउने उनी पहिलो खेलाडी हन् । संगिताले ५५ किलो तौल समूहमा बंगालदेशकी रिमी सरकारलाई पराजित गर्दै स्वर्ण पदक जितेकी थिइन् । उनले स्वदेशमा आयोजना भएका सबै कुस्ती प्रतियोगितामा स्वर्ण पदक जितेकीछिन् ।

ब्याडटमिन्टनका प्रिन्स दाहाल र कुस्तीकी सिवाङ्गी दुवे सुदूरपश्चिम आइकन घोषित भएका छन् । प्रिन्सलाई माया मेट्रो अस्पताल सुदूरपश्चिम आइकन (पुरुष) र सिवाङ्गीेलाई तिवारी मेडिसियन सुदूरपश्चिम आइकन (महिला) बाट पुरस्कृत गरिएको हो ।

प्रिन्सले १३ औं सागमा दोहोरो रजत पदक जितेका थिए । त्यस्तै उनले जुनियर ईन्टरनेशनल च्यालेन्जसमा कास्य पदक, प्रेसिडेन्ट कप नेपाल जुनियर ईन्टरनेशनल सिरिजको १९ बर्ष मुनिमा कास्य पदक र अन्नपुर्ण अन्तराष्ट्रिय सिरिजमा ऐतिहासिक रजत पदक जितेका थिए ।

१३ औ सागको कुस्तीमा सिवाङ्गीले रजत पदक जितेकी थिइन् । उनी कम उमेरमा खुल्ला समूहमा प्रतिस्पर्धा गर्दै नेपालका लागि पदक जित्ने युवा खेलाडी हुन् । उनी राष्ट्रियस्तरका कुस्ती प्रतियोगितामा विजेता रहँदै आएकी छिन् ।