ईलाम (हाम्रो खेलकुद) – नेपाल पुलिस क्लबले भारतीय खेलाडी सम्मिलित दमक नगर भलिबल क्लबलाई सोझो सेटमा पराजित गर्दै दोस्रो संस्करणको ईलाम आमन्त्रण खुल्ला पुरुष भलिबल प्रतियोगिता सेमिफाइनलमा प्रवेश गरेको छ ।

शुक्रबार पहिलो खेलमा पुलिसले दमकलाई ३-० को सोझो सेटमा पराजित गर्दै सेमिफाइनलमा स्थान पक्का गरेको हो । पुलिस समूह बी को उप विजेताको रुपमा सेमिफाइनलमा स्थान बनाएको हो । पुलिसले दमकलाइृ २५-२०, २५-१५ र २५-१६ को सोझो सेटमा सहजै पराजित गर्दै सेमिफाइनलमा स्थान बनाएको छ ।

समूह ‘बी’ मा एपिएफ २ खेलबाट ५ अंकका साथ शीर्ष स्थानमा रहँदै सेमिफाइनलमा पुग्यो । पुलिस ४ अंकका साथ दोस्रो स्थानमा रहँदै समूह उप विजेता बन्यो । पहिलो खेलमा पुलिस एपिएफसँग ३-२ को सेटमा पराजित भएको थियो । दमक एपिएफसँग ३-१ ले हारेको थियो । भारतीय खेलाडी सम्मिलित दमक समूह ख बाट अंक विहिन हुँदै बाहिरिएको छ ।

सेमिफाइन शनिबार र फाइनल आइतबार हुने छ । पहिलो सेमिफाइनलमा समूह ए को विजेता र समूह बी को उप विजेता पुलिसबीच प्रतिस्पर्धा हुने छ । दोस्रो सेमिफाइनलमा समूह बी को विजेता एपिएफ र समूह ए को उप विजेताबीच प्रतिस्पर्धा हुने छ ।

समूह ए मा रहेको आर्मी २ खेलमा ४ अंकका साथ शीर्षस्थानमा छ । भारतीय खेलाडी सम्मिलित विमान ट्रेडर्स विर्तामोड २ खेलमा ४ अंकका साथ दोस्रो स्थानमा छ । गण्डकी प्रदेशको ३ अंकका साथ तेस्रो र गौरादह नगर खेलकुद विकास समिति अंक विहिन हुँदै पुछारमा छ ।

प्रतियोगिता ४ देखि ८ चैतसम्म हुदैछ । प्रतियोगितामा ७ टोलीको सहभागिता छ । लिग कम नकआउटका आधारमा हुने प्रतियोगितामा सहभागी ७ टोलीलाई दुई समूहमा विभाजन गरिएको छ । समूह ‘ए’ मा त्रिभुवन आर्मी क्लब, विमान ट्रेडर्स, गौरादह नगर खेलकुद बिकास समिति र गण्डकी प्रदेश छन् । समूह ‘बी’ मा नेपाल एपिएफ क्लब, नेपाल पुलिस क्लब र दमक नगर भलिबल क्लब छन् ।

समूहका शीर्ष दुई टोलीले सेमिफाइनलमा स्थान बनाउनेछ । प्रतियोगिताको विजेताले २ लाख रुपैयाँ प्राप्त गर्नेछन् । दोस्रो हुने टोलीले १ लाख तथा तेस्रो हुने टोलीले ५० हजार रुपैयाँ हात पार्नेछन् ।