इंलाम (हाम्रो खेलकुद) – जिल्ला भलिबल संघ ईलामको आयोजनामा दोस्रो संस्करणको ईलाम आमन्त्रण खुल्ला पुरुष भलिबल प्रतियोगिता दोस्रो दिन आज (बिहिबार) तीन खेल हुँदै छन् ।

पहिलो खेलमा विभागीय टोली त्रिभुवन आर्मी क्लब र गौरादह नगर खेलकुद बिकास समितिबीच प्रतिस्पर्धा हुने छ । खेल बिहान ९ बजे सुरु हुने छ । पहिलो खेलमा आर्मीले विमान ट्रेडर्स विर्तामोडलाई ३–२ को सेटले पराजित गर्दै विजयी सुरुवात गरेको थियो ।

गौरादह पहिलो खेलमा गण्डकी प्रदेशसँग ३–० को सोझो सेटमा पराजित भएको थियो । आर्मी लगातार दोस्रो जितको खोजीमा हुने छ । गौरादह पहिलो जितको खोजिमा हुने छ । भारतीय खेलाडी सम्मिलित गौरादहलाई सेमिफाइनल यात्रा बलियो बनाउन आजको खेल जित्नुपर्ने हुन्छ ।

दोस्रो खेलमा समूह बी को विभागीय टोली नेपाल एपिएफ क्लब र दमक नगर भलिबल क्लबबीच प्रतिस्पर्धा हुने छ । खेल दिउँसो १२ बजे सुरु हुने छ । एपिएफले पहिलो खेलमा नेपाल पुलिस क्लबलाई ३–२ ले पराजित गर्दै विजयी सुरुवा गरेको थियो ।

दिनको तेस्रो खेलमा गण्डकी प्रदेश र विमान ट्रेडर्स विर्तामोडबीच प्रतिस्पर्धा हुने छ । खेल दिउँसो ३ बजे सुरु हुने छ । पहिलो खेलमा भारतीय खेलाडी सम्मिलित गौराहदलाई सोझो सेटमा पराजित गर्दै विजयी सुरुवात गरेको थियो । गण्डकी लगातार दोस्रो जितका साथ सेमिफाइनल यात्रा बलियो बनाउन चाहन्छ । यता पहिलो खेलमा आर्मीसँग पराजित भएको विर्तामोड गण्डकीलाई हराउँदै सेमिफाइनल यात्रा कायमै राख्न चाहन्छ ।

समूह ए मा समान एक खेलबाट गण्डकी ३ अंकका साथ शीर्ष स्थानमा छ । आर्मी २ अंकका साथ दोस्रो, विर्तामोड १ अंकका साथ तेस्रो र गौरादह अंक विहिन हुँदै पुछारमा छ । समूह बी मा समान एक खेलबाट एपिएफ २ अंकका साथ शीर्ष र पुलिस १ अंक जोड्दै दोस्रो स्थानमा छ । सबै खेलहरु ईलामको ठूलो टुडिखेल मैदानमा हुने छन्।

प्रतियोगिता ४ देखि ८ चैतसम्म हुदैछ । प्रतियोगितामा ७ टोलीको सहभागिता छ । लिग कम नकआउटका आधारमा हुने प्रतियोगितामा सहभागी ७ टोलीलाई दुई समूहमा विभाजन गरिएको छ । समूह ‘ए’ मा त्रिभुवन आर्मी क्लब, विमान ट्रेडर्स, गौरादह नगर खेलकुद बिकास समिति र गण्डकी प्रदेश छन् । समूह ‘बी’ मा नेपाल एपिएफ क्लब, नेपाल पुलिस क्लब र दमक नगर भलिबल क्लब छन् ।

समूहका शीर्ष दुई टोलीले सेमिफाइनलमा स्थान बनाउनेछ । प्रतियोगिताको विजेताले २ लाख रुपैयाँ प्राप्त गर्नेछन् । दोस्रो हुने टोलीले १ लाख तथा तेस्रो हुने टोलीले ५० हजार रुपैयाँ हात पार्नेछन् ।