काठमाडौंं (हाम्रो खेलकुद) – आगमी जेठमा पोखरामा आयोजना हुने ‘ए’ डिभिजन राष्ट्रिय फुटसल लिगमा प्रदेश १ बाट फुटसल ५ धरान र राइजिङ एफसी छनोट भएका छन् ।

उनीहरु प्रदेश १ को विजेता र उपविजेताको रुपमा छनोट भएका हुन् । पाथिभारा फुटसल इटहरीमा मंगलबार भएको फाइनलमा फुटसल ५ धरानले राइजिङ एफसीलाई पेनाल्टी सुटआउटमा पराजित गर्दै च्याम्पियन बने । निर्धारित समयको खेल ४–४ गोलको बराबरीमा सकिएपछि खेलको निर्णय पेनाल्टी सुटआउटबाट लिइएको थियो । जसमा फुटसल ५ धरानले बाजी मा¥यो । छनोट भएको दुवै टोलीले तयारी खर्च स्वरुप समान १–१ लाख रुपैयाँ प्राप्त गरेका छन् ।

विजयी टोलीलाई अखिल नेपाल फुटबल संघ (एन्फा) का वरिष्ठ उपाध्यक्ष पंकज विक्रम नेम्वाङ, एन्फा फुटसल कमिटिका संयोजक रत्न कुमार श्रेष्ठ, हेड अफ फुटसल विनोद गुरुङलगायतले पुरस्कृत गरे । प्रदेश १ को छनोटमा ८ टिमको सहभागिता रहेको थियो । अब लुम्बिनी, कर्णाली र सुदूरपश्चिमको छनोट दाङमा १९ देखि २३ चैतसम्म हुनेछ । बागमतीको छनोट खेलहरु काठमाडौंमा चैत २५ देखि ३० सम्म हुनेछ । गण्डकीको छनोट खेलहरु पोखरामा बैशाख ३ देखि ७ सम्म हुनेछ ।

फुटसलको ‘ए’ डिभिजन लिग जेठ १ देखि २२ सम्म पोखराको बहुउद्देश्यीय कभर्डहलमा हुनेछ । लिगमा १० टिमले प्रतिस्पर्धा गर्नेछ । जसमा बागमती प्रदेशबाट ४ टोली, प्रदेश १ र गण्डकी प्रदेशबाट समान २–२, प्रदेश २ बाट एक टोली तथा लुम्बिनी, कर्णाली र सुदूरपश्चिम प्रदेशबाट संयुक्त एक टिम हुनेछ ।

लिग विजेताले १० लाख तथा उपविजेताले ५ लाख रुपैयाँ पाउने छन् । उत्कृष्ट गोलकिपर, उत्कृष्ट विंगर, उत्कृष्ट डिफेन्डर, उत्कृष्ट प्रशिक्षक र इमर्जिङ खेलाडीले समान २५ हजार रुपैयाँ पाउने छन् । एन्फाले सहभागी हरेक टिमलाई १ लाख रुपैयाँ उपलब्ध गराउने छन् ।
प्रतियोगिताबाट नेपालको राष्ट्रिय फुटसल टोली चयन गरिने अखिल नेपाल फुटबल संघ (एन्फा) ले जनाएको छ । एन्फाले इरानसँग मैत्रीपुर्ण फुटसल खेलाउने तयारी गरिरहेको छ ।