नेपालगन्ज (हाम्रो खेलकुद) – साविक विजेता नेपाल पुलिस क्लबले सातौ संस्करणको प्रधानमन्त्री कप महिला राष्ट्रिय भलिबल प्रतियोगिताको तेस्रो खेलमा आज (सोमबार) विभागीय टोली त्रिभुवन आर्मी क्लबको सामना गर्दैछ ।

बाँके जिल्ला भलिबल संघको आयोजनामा जारी प्रतियोगिताको उक्त खेल नेपालगन्जस्थित रंगशाला परिसरमा रहेको कभर्डहलमा दिउँसो ३ बजेपछि हुनेछ । अपराजित रहेको पुलिस आर्मीलाई हराउदै उपाधि सम्भावनालाई बलियो बनाउने लक्ष्यमा हुनेछ ।

पुलिसको दुई खेलबाट ५ अंक छ । पछिल्लो समय उत्कृष्ट प्रदर्शन गरिरहेको पुलिससँग कप्तान कोपिला उप्रेती, उषा भण्डारी, कामना विष्ट, कमला पुन, कोपिला राना, शान्तिकला तामाङ, मनिषा चौधरी, तिला चौधरी र पुष्पा चौधरीको साथ रहेको छ ।

यता, आर्मी पनि पुलिसलाई स्तब्ध पार्न लक्ष्यमा कोर्टमा उत्रनेछ । आर्मीको ३ खेलबाट ३ अंक छ । आर्मीसँग कप्तान कृपा अधिकारी, साफिया पुन, सुनिता खड्का, शान्ति थारु, संगम महतो, सरस्वती खतिवडा, जानकी भण्डारी र सृष्टि खड्गीको साथ रहेको छ ।

यि दुई टोलीले पछिल्लोपटक पोखरामा १ फागुनमा सम्पन्न टाइगर कप आमन्त्रण भलिबल प्रतियोगिताको लिग चरणमा प्रतिस्पर्धा गरेका थिए । जसमा पुलिस ३–१ को सेटमा विजयी भएको थियो । पुलिस सोही जितलाई निरन्तरता दिने दाउमा रहँदा आर्मी उक्त हारको बदला लिने लक्ष्यमा हुनेछ ।