नेपालगन्ज (हाम्रो खेलकुद) – प्रधानमन्त्री कप महिला राष्ट्रिय भलिबल प्रतियोगितामा आज दुई महत्वपुर्ण खेल हुदैछ ।

पहिलो खेलमा होङ्गान्जी न्यु डायमन्ड स्पोर्ट्स क्लब र विभागीय नेपाल एपिएफ क्लब तथा दोस्रो खेलमा नेपाल पुलिस क्लब र त्रिभुवन आर्मी क्लबबीच प्रतिस्पर्धा हुदैछ । खेलहरु नेपालगन्जस्थित रंगशाला परिसरमा रहेको कभर्डहलमा दिउँसो १ र ३ बजे हुनेछ ।

डायमन्ड एपिएफलाई हराउदै उपाधि सम्भावनालाई जीवितै राख्ने लक्ष्यमा हुनेछ । पहिलो खेलमा पुलिससँग् ३–२ को सेटमा पराजित भएको डायमन्डले दोस्रो खेलमा त्रिभुवन आर्मी क्लबलाई ३–१ को सेटमा पराजित गर्दै उपाधि सम्भावनालाई जीवितै राखेको थियो ।

डायमन्डको दुई खेलबाट ४ अंक छ । टोलीसँग प्रतिभा माली, अरुणा शाही, कप्तान ललितानाथ, सलिना श्रेष्ठ, झरना श्रेष्ठ, बालमिका आचार्य, रिया कुँवर, प्रतिक्षा गुरुङ, पनामिका राई, एन्जिला प्रधान, प्रगतिनाथ र रिमा कुँवरको साथ रहेको छ ।

यता, प्रतियोगितामा अपराजित रहेको एपिएफलाई डायमन्डलाई हराउदै उपाधि यात्रालाई थप बलियो बनाउने लक्ष्यमा हुनेछ । एपिएफले आर्मी र लुम्बिनी युनाइटेडलाई पराजित गरेको थियो ।

टोलीसँग सरस्वती चौधरी, रेश्मा भण्डारी, निरुता ठगुन्ना, उषा विष्ट, हिरा केसी, कप्तान बिनिता बुढाथोकी, नेविका चौधरी, मनिषा तामाङ, कविता भट्ट, यमुना रसाइली, पुजा चौधरी र शशी चौधरीको साथ रहेको छ ।

यि दुई टोलीले पछिल्लोपटका पोखरामा १ फागुनमा सम्पन्न टायगर कप आमन्त्रण भलिबल प्रतियोगिताको लिग चरणमा प्रतिस्पर्धा गरेका थिए । जसमा एपिएफ ३–० को सोझो सेटमा विजयी भएको थियो । एपिएफ सोही जितलाई निरन्तरता दिने दाउमा रहँदा डायमन्ड उक्त हारको बदला लिने लक्ष्यमा हुनेछ ।