काठमाडौं (हाम्रो खेलकुद) – आर्मीका कृष्ण बस्नेतले छैटौ प्रधानसेनापति खुल्ला म्याराथनको उपाधि जितेका छन् ।

शनिवार भएको म्याराथनमा कृष्णले निर्धारित ४२.१९५ किलोमिटरको दुरी २ घण्टा २१ मिनेट ५९ सेकेण्डमा पुरा गर्दै उपाधि जितेका हुन् । उनले भारतीय सेनाका तीर्थ पुन र गतवर्षको विजेता होमलाल श्रेष्ठलाई पछि पार्दै उपाधि जितेका हुन् ।

प्रधानसनापति म्याराथनको उनको यो तेस्रो उपाधि हो । उनले यसअघि तेस्रो र चौथो संस्करणको उपात्रि जितेको थियो । दोस्रो भएको भारतीय सेनाका तीर्थ पुनले २ घण्टा २२ मिनेट २७ सेकेण्डमा दुरी पार गरे । गतवर्षको विजेता होमलालले २ घन्टा २३ मिनेट ३२ सेकेण्डमा दुरी पार गर्दै तेस्रो स्थान हासिल गरे ।

आर्मीका खगेन्द्र भाट, नवराज साउद, ज्ञान प्रसाद भट्टराई, देवरान महतारा, सागर बुढाथोकी, रमेश मगराती र प्रेम बस्नेतले शीर्ष १० भित्र दौड सकाए । उपाधिसँगै कृष्णले नगद ३ लाखसँगै एक थान यमाहा मोटरसाइकल हात पारे । दोस्रो भएको तीर्थले २ लाख तथा तेस्रो भएको होमलालले १ लाख रुपैयाँ हात पारे ।

पुरुष हाफ म्याराथनमा आर्मीका गजेन्द्र राईले १ घन्टा ६ मिनेट ३० सेकेन्डमा दुरी पार गर्दै पहिलो भए । दोस्रो भएको राजन रोक्काले १ घन्टा ७ मिनेट ११ सेकेन्डमा तथा तेस्रो भएको नरेन्द्र रावलले १ घन्टा ८ मिनेट ८४ पल्समा दुरी पार गरे । उपाधिसँगै गजेन्द्रले ७५ हजार रुपैयाँ हात पारे । दोस्रो भएको राजले ५० हजार तथा तेस्रो भएको नरेन्द्रले ३५ हजार हात पारे ।

हाफ म्याराथनतर्फ महिलातर्फ एपिएफकी पुष्पा भण्डारी पहिलो भइन् । उनले निर्धारित दुरी २१ किलोमिटर दुरी १ घण्टा १७ मिनेट ३३ सेकेन्डमा पार गर्दै उपाधि जितेकी हुन् । उनी गतवर्षको पनि विजेता हुन् ।

यो वर्ष पुष्पाको यो तेस्रो हाफ म्याराथन उपाधि हो । मंसिरमा नेपालगन्जमा आयोजना भएको नेपालगन्ज म्याराथन अन्तरगतको हाफ म्याराथनको उपाधि जितेको पुष्पाले त्यसपछि दक्षिण एसियाली महिला म्याराथनमा स्वर्ण जितेकी थिइन् । उनी १३औं सागको म्याराथनको रजत विजेता खेलाडी हुन् ।

आर्मीकी विश्वरूपा बुढा १ घण्टा २० मिनेट ९ सेकेन्डमा निर्धारित दुरी पूरा गरि दोस्रो तथा एपिएफकी बिन्दा श्रेष्ठ १ घण्टा २४ मिनेट ४६ सेकेन्डसहित तेस्रो भइन् । उनले ट्रफीसहित नगद ७५ हजार र स्कुटी र राजेन्द्र क्षेत्री अक्षय कोसबाट थप २० हाजार प्राप्त गरिन् । दोस्रो भएको विश्वरुपाले ५० हजार तथा तेस्रो भएकी बिन्दा श्रेष्ठले ३५ हजार रुपैयाँ हात पारिन् ।

भेट्रान्सतर्फ धर्म महर्जन पहिलो, भिम बहादुर गुरुङ दोस्रो र भिमसेन अवाले तेस्रो भए । धर्मले ५० हजार, भीमले ३५ हजार र भीमसेनले २५ हजार पाए । १० किमि गैर सैनिकमा सुमन न्यौपाने, दिनेश बोगटी र महेन्द्र बराल क्रमशः पहिलो, दोस्रो र तेस्रो भए । महिलामा सरस्वती बोहोरा पहिलो, बन्दना राई दोस्रो र सचिना सुनुवार तेस्रो भइन् ।

१० किमी सैनिक पुरुषमा विषन्त विष्ट पहिलो, डम्मर बुढा दोस्रो र बिशालचन्द्र बाजी तेस्रो भए । महिलामा दुर्गा केसी, चन्द्रा बानियाँ र देवी पुन क्रमश पहिलो दोस्रो र तेस्रो भइन् । यि विधाका शीर्ष तीनले क्रमश १० हजार, ७ हजार र ६ हजार रुपैयाँ हात पारे ।

५ किमी छात्रतर्फ विशुराम कुँवर पहिलो भए । बिमल विक्रम थापा दोस्रो तथा अनिल कुमार तेस्रो भए । छात्रामा सदक्षिा कार्की पहिलो, स्वेच्छा बलामी मगर दोस्रो र मिना डाँगी तेस्रो भइन् ।

म्याराथनको पहिलो संस्करणमा पुलिसका भुमिराज राई, दोस्रोमा एपिएफका गोपीचन्द्र पार्की र तेस्रो र चौथोमा आर्मीका कृष्ण बस्नेत तथा पाँचौमा आर्मीकै होमलाल श्रेष्ठ च्याम्पियन बनेका थिए ।