नेपालगन्ज (हाम्रो खेलकुद) – सातौं संस्करणको प्रधानमन्त्री कप महिला राष्ट्रिय भलिबलमा आज दुई खेलमा प्रतिस्पर्धा हुदैछ ।

उपाधि दावेदार विभागीय नेपाल एपिएफ क्लबले अर्काे विभागीय टोली त्रिभुवन आर्मी क्लबसँग आज १ बजे नेपालगन्जस्थित कभर्डहलमा प्रतिस्पर्धा गर्दैछ ।

एपिएफ आर्मीलाई हराउदै सुखद सुरुवात गर्ने लक्ष्यमा हुनेछ । टोलीसँग कप्तान विनिता बुढाथोकी, रेश्मा भण्डारी, सरस्वती चौधरी, नेविका चौधरी, हीरा केसी, उषा विष्ट, निरुता ठगुन्ना, कविता भट्ट, मनिषा तामाङ, यमुना रसाइलीको साथ रहेको छ ।

पहिलो खेलमा लुम्बिनी युनाइटेड टिममाथि सहज जित पाएको आर्मी सोही जितलाई निरन्तरता दिदै उपाधि जित्ने सम्भावना बलियो बनाउने लक्ष्यमा हुनेछ । टोलीसँग राष्ट्रिय टोलीमा रहेका सुनिता खड्का, साफिया पुन, जानकी भन्डारी, कप्तान कृपा अधिकारी, मनिषा खाँड, संगम महतो, शान्ति थारु, सरस्वती खतिवडा, रेखा शाही र सृष्टि खड्गीको साथ रहेको छ ।

फागुन १ मा पोखरामा सम्पन्न टाइगर कप आमन्त्रण भलिबलमा एपिएफले आर्मीलाई ३–२ को सेटमा हराएको थियो । एपिएफलाई जितलाई निरन्तरता दिने लक्ष्यमा रहँदा आर्मी एपिएफलाई हराउने लक्ष्यमा हुनेछ ।

अर्काे खेलमा साविक विजेता नेपाल पुलिस क्लबले लुम्बिनी युनाइटेड टिमको सामना गर्नेछ । खेल ३ बजे हुनेछ ।

पुलिस लगातार दोस्रो जितको खोजीमा रहँदा लुम्बिनी पनि पुलिसलाई कडा चुनौती दिने लक्ष्यमा हुनेछ । पुलिसले पहिलो खेलमा होङ्गान्जी न्यु डायमन्ड स्पोर्ट्स क्लबलाई ३–२ को सेटमा पराजित गर्दा लुम्बिनी आर्मीसँग ३–० को सोझो सेटमा पराजित भएको थियो ।

अंक तालिकाको शीर्षस्थानमा रहने टोली च्याम्पियन बन्नेछ । प्रतियोगितामा नेपाल पुलिस, एपीएफ, त्रिभुवन आर्मी, न्यू डायमन्ड र लुम्बिनी युनाइटेडको सहभागिता रहेको छ । प्रतियोगितामा विजातालाई ५ लाख, दोस्रो हुनेलाई दुई लाख, तेस्रो हुनेलाई १ लाख र चौथो हुनेलाई ५० हजार रुपैयाँ पुरस्कार राशी रहेको छ ।