काठमाडौं (हाम्रो खेलकुद) – ढोरपाटन स्पोर्ट्स क्लबको आयोजनामा भएको प्रादेशिक भलिबल रेफ्री कोर्ष आइतबार सम्पन्न भएको छ ।

(९ देखि १६ फागुन) ८ दिनसम्म चलेको रेफ्री कोर्षमा ३६ जिल्लाबाट १०७ जना प्रशिक्षार्थीहरुको सहभागिता रहेको थियो । रेफ्री प्रशिक्षण कोर्षमा सामान्य प्रतियोगिता खेलाइरहेका रेफ्री, जिल्ला भलिबल संघका रेफ्री तथा खेलाडीहरुले सहभागिता जनाएका थिए ।

जसबाट ८ जना प्रशिक्षार्थीले शतप्रतिशत अंक ल्याउदै उत्तिर्ण हुदा बाँकी ९९ जना पनि उत्तिर्ण हुन सफल भएको ढोरपाटन क्लबका सचिव खुम गाउलेले जानकारी गराए ।यससँगै उनीहरु सबैले प्रादेशिक भलिबल रेफ्रीको लाइसेन्स र प्रमाणपत्र प्राप्त गरेका छन् ।

प्रादेशिक रेफ्रीमा बढुवा भएपनि उनीहरुले तीन वर्षसम्म राष्ट्रिय प्रतियोगिता चलाउन मिल्ने छैन । राष्ट्रिय प्रतियोगिता चलाउन उनीहरुले स्थानिय प्रतियोगिता पनि गर्नुपर्ने सचिव गाउलेले बताए ।
ढोरपाटन क्लबको खेल मैदान, साउथ वेस्ट स्टेट कलेज, ऋत एकेडेमीमा ८ दिनसम्म चलेको कोर्षमा ६ जना रेफ्रीले प्रयोगात्मक र लिखित परीक्षा लिएका थिए ।

अन्तर्राष्ट्रिय भलिबल रेफ्री गौतम प्रसाद लासिवा, कुल बहादुर राना, एसियन भलिबल रेफ्री क्यान्डिडेट बिकास गुरुङ, विजय केसी, एसियन रेफ्री विजय कृष्ण बादे, राष्ट्रिय रेफ्री अशोक थापा र खुम गाउले मगरले प्रशिक्षण दिएका थिए । पुर्व भलिबल प्रशिक्षक कपिल किशोर श्रेष्ठले पनि प्रशिक्षण दिएका थिए ।

ढोरपाटन क्लबका अध्यक्ष मनवीर छन्त्यालले भलिबलको दक्ष जनशक्ति तयार पार्न कोर्सको आयोजना गरिएको बताए । अन्तर्राष्ट्रिय भलिबल रेफ्री गौतम प्रसाद लासिवाले प्रादेशिक भलिबल रेफ्री कोर्ष अत्यन्तै उत्साहपुर्वक सुरु र समापन भएको बताए ।

सोही अवसरमा नेपाल भलिबल संघले अन्तर्राष्ट्रिय भलिबल रेफ्रीमा बढुवा भएका कुल बहादुर रानालाई प्रमाणपत्र हस्तान्तरण गरिएको छ । फेडेरेसन अफ इन्टरनेसनल भलिबल (एफआइभीबी) ले गत मसिंरमा कुल बहादुर राना र चन्द्र बदना राईलाई अन्तर्राष्ट्रिय भलिबल रेफ्रीमा बढुवा भएको पत्र पठाएको थियो । कुल बहादुर राना गौतम लासिवा पछि एफआइभीबीबाट आधिकारिक अन्तर्राष्ट्रिय भलिबल रेफ्री बन्ने दोस्रो रेफ्री हुन् ।