ललितपुर (हाम्रो खेलकुद) – ‘ए’ डिभिजन टोली फ्रेन्ड्स क्लबको साधरणसभा शनिबार सम्पन्न भएको छ ।

क्लबका अध्यक्ष राजिव पौडेलको अध्यक्षतामा भएको साधरण सभाले विभिन्न चार निर्णय गरेको छ । साधरणसभाले आगमी चैत २८ गते नयाँ कार्यसमिति चयनका लागि क्लबका आजिवन सदस्य राम खनाको संयोजकत्वमा निर्वाचन समिति गठन गरेको छ ।

विश्व फुटबल महासंघ (फिफा) र एसियाली फुटबल कन्फेडेरेसन (एएफसी)को नीति अनुसार क्लबको विधान संशोधन गर्ने निर्णय गरेको छ ।

यस्तै क्लब लाइसेन्सिङ प्रक्रियालाई अघि बढाउने र चाँगुनारायण नगरपालिका वडा नम्वर ४ मा खेल मैदान निर्माण गर्ने निर्णय गरेको छ । ५० रोपनीमा बन्ने मैदानको डिपिआर तयार भइरहेको क्लबका प्रवक्ता राजाराम तन्डुकारले बताए ।

चागुनारायण नगरपालिकाका मेयर सोम प्रसाद मिश्रले खेल मैदानसम्म पुग्ने बाटो, ढल, खानेपानी को सुबिधा उपलब्ध गराउनाको साथै आवस्यक अन्य सहयोग गर्ने प्रतिबद्धता व्यक्त गरेका छन् । उनले चागुनारायण नगरपालिकामा रग्बी, टेवलटेनिस, ब्याडमिन्टन, बास्केटबल, भलिबललगायत अन्य खेलकुद मैदान र खेलकुद हल बनाउदै गरेको जानकारी गराए ।

युवा तथा खेलकुद मन्त्री दावा लामा तामाङले एन्फा र क्लबहरुसँग सहकार्य गरि क्लबहरुलाई एएफसी लाइसेन्स प्रक्रियाका लागि आवस्यक नीतिनिर्माणमा सहयोग गर्ने बताए ।

साधरणसभामा युवा तथा खेलकुद मन्त्री दावा लामा तामाङ, ललितपुर महानगरपालिकाका मेयर चिरिबाबु महर्जन, चाँगुनारायण नगरपालिकाका मेयर सोमप्रसाद मिश्र, अखिल नेपाल फुटबल संघ (एन्फा) का अध्यक्ष कर्माछिरिङ शेर्पा र एन्फाका उपाध्यक्ष पंकज नेम्वाङलगायतको उपस्थित रहेको थियो ।