काठमाडौं (हाम्रो खेलकुद) – यती एअरलान्सले आफ्नो समूहका प्रबन्ध निर्देशक स्वर्गीय आङछिरिङ शेर्पाको दोस्रो बार्षिक स्मृतिमा अर्को साता गल्फ प्रतियोगिता आयोजना गर्ने भएको छ ।

गोकर्ण फरेस्ट रिसोर्टमा फागुन २१ र २२ गत दुईदिने प्रतियोगिता हुने यती एअरलायन्सले जनाएको छ । स्व शेर्पाकोे स्मृतिमा हुन लागेको प्रतियोगितामा देशभरका १ सय ५० खेलाडीले भाग लिने यती एअरलाइन्सका प्रवक्ता एवम् हवाई सुरक्षा प्रमुख सुदर्शन बर्तौलाले जानकारी दिए ।

प्रवक्ता बर्तौलाले भने,’ पर्यटन व्यवसायी स्व शेर्पाले नेपालमा गल्फमार्फत पर्यटन क्षेत्रमा गरेको थालनी, लगानी र योगदानलाई स्मरण गर्दै प्रतियोगिता आयोजना गर्न लागेका हौं ।’ यती एअरलाइन्सले अर्को वर्ष प्रतियोगितालाई थप बृहत र व्यवस्थित बनाउँदै नेपालको सुदरपश्चिम देखि पूर्वसम्मका ऐतिहासिक एवं पर्यटकीय स्थलहरुमा पनि आयोजना गर्ने लक्ष्य रहेको जनाएको छ ।

प्रतियोगितामा दर्ता शुल्कमार्फत् संकलन भएको रकम सोही समय मै गैरनाफामुखी एवम् समाजसेवा गरिरहेको संस्थालाई हस्तान्तरण गरिने यती एअरलाइन्सले घोषणा गरेको छ ।प्रतियोगिताका विजेता र रनरअप, उत्कृष्ट ग्रस र रनरअप, महिला तर्फको विजेता र रनरअप, भेट्रान तर्फका विजेता, जुनियर तर्फका बिजेता, लङ्गेस्ट ड्राइभ, उत्कृष्ट बडिज र क्लोजेष्ट टु पिन गरी मुख्य ११ वटा विधालाई पुरस्कृत गरिनेछ ।

प्रतियोगिताको मुख्य विजेताले उपाधिसहित ५ लाख रुपैयाँ बराबरको ट्राभल प्याकेज जित्नेछन् । अन्य विजेताहरुले यती गु्रपकै सञ्चालनमा रहेका कम्पनी तथा रिसोर्टहरुले प्रायोजन गरेको विशेष ट्राभल प्याकेज प्राप्त गर्नेछन् ।

त्यसमा एअर डाइनेस्टी, हिमालय एअरलाइन्स, यती एअरलाइन्स, तारा एअर, यती माउन्टेन होम, मोक्ष रिसोर्ट, गोकर्ण फरेस्ट रिसोर्ट, कसरा रिसोर्ट र केर एण्ड डाउनी रहेका छन् । प्रतियोगिताको मुख्य आयोजकमा यती एअरलाइन्स र गोकर्ण फरेस्ट रिसोर्ट रहेका छन् । शेर्पाको २०७५ फागुन १५ मा ताप्लेजुङमा हेलिकप्टर दुर्घटनामा परेर निधन भएको थियो ।