पोखरा (हाम्रो खेलकुद) – म्याग्दी र तनहुँले गण्डकीको मुख्यमन्त्री कप प्रदेशस्तरिय भलिवल प्रतियोगिताको उपाधि जितेका छन् । म्याग्दी महिलातर्फ तथा तनहुँ पुरुषतर्फ च्याम्पियन बनेका हुन् ।

पोखरा रंगशालास्थित भलिबल कोर्टमा पुरुषतर्फको फाइनलमा तनहुँले उपाधि दावेदार मानिएको स्याङ्जालाई ३–२ को सेटमा पराजित गर्दै उपाधि जितेको हो । तनहुँले पहिलो सेट २३–२५ ले गुमाएपनि दोस्रो सेटमा २५–१७ को सेटमा जित निकाल्दै खेललाई १–१ सेटको बराबरीमा ल्यायो ।

तेस्रो सेटमा पनि तनहुँ २५–२० को सेटमा विजयी हुदा चौथो सेट स्याङ्जाले २५–१३ ले आफ्नो पक्षमा पार्दै खेललाई पाँचौ सेटमा लम्ब्यायो । तर, निर्णाय सेटमा तनहुँले स्याङ्जालाई १५–१० को सेटमा जित निकाल्दै उपाधि जित्न सफल भयो ।

महिलातर्फको फाइनलमा म्याग्दीले पर्वतलाई ३–० को सोझो सेटमा हराउँदै उपाधि जित्न सफल भयो । म्याग्दीले पर्वतमाथि २५–१४, २५–१४ र २५–१७ ले जित निकाल्दै उपाधि उचालेको हो ।

पुरुषतर्फ पर्वतले म्याग्दीलाई २३–२५, २५–१४, २५–१७ र २७–२५ को सेटमा पराजित गदर्दै तेस्रो स्थान हात पार्यो । महिलातर्फ तनहुँले कास्कीलाई २५–१६, २२–२५, २५–१४ र ३०–२८ ले पराजित गर्दै तेस्रो हुन सफल भयो ।

उपाधिसँगै विजेता पुरुष तथा महिला टोलीले समान २–२ लाख रुपैयाँ प्राप्त गरेको छ । दोस्रो भएका टोलीले समन १–१ लाख तथा तेस्रो भएको टोलीले समान ५०–५० हजार प्राप्त गरे ।

कास्की जिल्ला भलिवल संघको आयोजनामा ४ फागुनबाट सुरु भएको प्रतियोगिताको विजयी टोली तथा खेलाडीलाई गण्डकी प्रदेशका मुख्य मन्त्री पृथ्वीसुव्वा गुरुङ, राखेपका सदस्य राजेश गुरुङ लगायतले पुरस्कृत गरे ।

सोही अवसरमा भलिवल खेलको विकासमा योगदान पुर्याएको भन्दै भलिबल प्रशिक्षक कौशिला खत्री र पोखराका टप्स, ज्ञानुबाबा र फिस्टेल एकेडमीलाई सम्मान गरिएको थियो ।