काठमाडौं (हाम्रो खेलकुद) – स्याङ्जा र तनहुँ तथा म्याग्दी र पर्वत पोखरामा जारी मुख्यमन्त्री कप गण्डकी प्रदेशस्तरिय महिला तथा पुरुष भलिबल प्रतियोगितमामा पुरुषतर्फ फाइनलमा प्रवेश गरेका छन् ।

स्याङ्जा र तनहुँ पुरुषतर्फ तथा म्याग्दी र पर्वत महिलातर्फको उपाधिनजिक पुगेका हुन् । पोखरा रंगशालास्थित भलिबल कोर्टमा शुक्रबार भएको पुरुषतर्फको सेमीफाइनलमा स्याङ्जाले पर्वतलाई ३–१ सेटले पराजित गर्दै फाइनलमा स्थान बनाएको हो ।

स्याङ्जाले पहिलो सेट २५–२० ले आफ्नो पक्षमा पार्दा दोस्रो सेटमा २५–१७ को सेटमा जित निकालेको थियो । तेस्रो सेट पर्वतले २७–२५ ले आफ्नो पक्षमा पार्दै खेललाई चौथो सेटमा लम्ब्याएका थिए । तर चौथो सेटमा स्याङ्जा २५१७ को सोझो सेटमा विजयी हुदै उपाधिनजिक पुग्यो ।

दोस्रो सेमिफाइनलमा तनहुँले बलियो मानिएको म्याग्दीलाई ३–१ सेटले पराजित गर्दै फाइनलमा स्याङ्जासँगको भेट पक्का गर्‍यो । पहिलो सेट २१–२५ ले गुमाएको तनहुँले रोमाञ्चक र प्रतिस्पर्धात्मक बनेको दोस्रो सेट ३२–३० को जित निकालेको थियो । तेस्रो सेट २५–१४ ले सहजै आफ्नो पक्षमा पार्दा चौथो सेट तनहुँले २५–२२ ले जित्न सफल भयो ।

महिलातर्फ म्याग्दीले तनहुँलाई ३–० को सोझो सेटमा जित निकाल्दै फाइनलमा पुग्न सफल भयो । एक पक्षीय खेलमा म्याग्दीले तनहुँमाथि २५–११, २५–१९ र २५–१३ को सोझो सेटमा जित निकाल्यो ।

अर्काे खेलमा पर्वतले आयोजक कास्कीलाई ३–० को सोझो सेटमा हराउदै फाइनलमा म्याग्दीसँगको भेट पक्का गर्‍यो । पर्वतले कास्कीलाई २५–१५, २५–२३ र २५–१२ को सोझो हराउन सफल भयो ।
प्रतियोगिताको फाइनल र तेस्रो स्थानको लागि शनिबार प्रतिस्पर्धा हुनेछ ।

कास्की जिल्ला भलिवल संघद्वारा आयोजित प्रतियोगिताको महिला र पुरुष दुवै विजेताले समान २–२ लाख तथा उपबिजेता दुबैले नगद १–१ लाख रुपैयाँ प्राप्त गर्नेछन् । तेस्रो हुने टोलीले समान ५०–५० हजार रुपैयाँ प्राप्त गर्नेछन् ।

सर्वोत्कृष्ट महिला तथा पुरुष खेलाडीसँगै व्यक्तिगत विधातर्फ उत्कृष्ट सेटर, डिफेन्डर, स्पाइकर र सेटरलले समान ५–५ हजार प्राप्त गर्नेछन् ।