पोखरा÷(हाम्रो खेलकुद) – मुख्यमन्त्री कप गण्डकी प्रदेशस्तरिय महिला तथा पुरुष भलिवल च्याम्पियनसिपको सेमिफाइनल समिकारण पुरा भएको छ ।

महिलातर्फ म्याग्दी, तनहुँ, पर्वत र कास्की सेमिफाइनलमा प्रवेश गरेका छन । यस्तै पुरुषतर्फ स्याङजा, पर्वत, म्याग्दी र तनहुँले अन्तिम चारको यात्रा तय गरेको छ । महिला र पुरुष दुवैको सेमिफाइनल शुक्रबार हुने आयोजकले जनाएको छ ।

पोखरा रंगशालास्थित भलिबल कोर्टमा बिहीबार भएको क्वाटरफाइनलमा पुरुषतर्फको खेलमा स्याङ्जाले बाग्लुङमाथि २५–२० र २७–२५ को सोझो सेटमा जित निकाल्यो । पर्वतले भने गोर्खाबाट वाकओभर पायो ।

यस्तै म्याग्दीले कास्कीलाई २५–१९ र २५–१२ को सोझो सेटमा हराउदै अन्तिम चारको यात्रा तय गर्न सफल भयो । तनहुँले नवलपुरलाई २५–१८ र २५–२० को सेटमा हरायो । अब सेमिफाइनल स्याङ्जा र पर्वत तथा म्याग्दी र तनहुँ भिड्नेछन् ।

महिलातर्फ म्याग्दीले स्याङ्जामाथि २५–५ र २८–२६ को सेटमा जित निकाल्दै अन्तिम चारमा पुग्न सफल भयो । यस्तै तनहुँले मुस्ताङलाई २५–६ र २५–९ को सेटमा तथा पर्वतले नवलपुरलाई २५–८ र २५–९ ले पराजित गर्दै सेमिफाइनलमा पुग्न सफल भयो ।

त्यस्तै कास्कीले बाग्लुङमाथि २–१ को सेटमा जित निकाल्यो । पहिलो सेट १९–२५ ले गुमाएको कास्कीले त्यसपछिको सेट २५–२३ र २५–१८ ले जित्दै सेमिफाइनलमा स्थान पक्का गरेको हो । अब सेमिफाइनलमा म्याग्दी र तनहुँ तथा पर्वत र कास्कीबीच प्रतिस्पर्धा हुनेछ ।

कास्की जिल्ला भलिवल संघद्वारा आयोजित प्रतियोगिताको महिला र पुरुष दुवै विजेताले समान २–२ लाख तथा उपबिजेता दुबैले नगद १–१ लाख रुपैयाँ प्राप्त गर्नेछन् । तेस्रो हुने टोलीले समान ५०–५० हजार रुपैयाँ प्राप्त गर्नेछन् ।

सर्वोत्कृष्ट महिला तथा पुरुष खेलाडीसँगै व्यक्तिगत विधातर्फ उत्कृष्ट सेटर, डिफेन्डर, स्पाइकर र सेटरलले समान ५–५ हजार प्राप्त गर्नेछन् ।