पोखरा (हाम्रो खेलकुद) – स्वर्गिय महेश खड्काको स्मृतिमा पोखरा रंगशालामा यही बुधबारदेखि महेश खड्का स्मृति कप क्लब स्तरीय महिला तथा पुरुष भलिबल प्रतियोगिताको तयारी अन्तिम चरणमा पुगेको छ ।

युनाइटेड पोखरा क्लब कास्कीको आयोजनामा प्रतियोगिता १२ देखि १५ फागुनसम्म पोखरा रंगशालास्थित भलिबल कोर्टमा हुन लागेको हो । स्व.खड्काको सम्झनामा स्थापना गरिएको स्मृति कपलाई निरन्तरता दिई खेलकुद विकासमा टेवा पु¥याउने उद्देश्यका साथ सुरु गरिएको क्लबका उपाध्यक्ष तथा खेलकुद संयोजक युवराज भण्डारीले बताए ।

मूल आयोजक समिति उपाध्यक्ष तथा कार्यक्रम संयोजक लक्ष्मण काप्रीले राष्ट्रिय तथा अन्तराष्ट्रिय खेलाडी उत्पादन गर्ने उद्देश्यले उनको सम्झनामा यो प्रतियोगिता आयोजना गर्न लागिएको बताए ।

पुरुषतर्फ प्रतियोगिताको विजेताले ८० हजार रुपैयाँ प्राप्त गर्नेछन् । दोस्रो हुनेले ५० हजार र महिलातर्फको विजेताले २५ हजार र दोस्रो हुनेले १५ हजार पाउनेछन् । विधागतमा पुरस्कारको व्यवस्था गरिएको छ ।

क्लबका अध्यक्ष अनिल गुरुङले प्रतियोगिताबाट संकलित रकम दिवंगत खड्काको परिवारलाई प्रदान गर्नुका साथै सामाजिक एवम् खेलकुदको विकास र विस्तारको लागि खर्च गरिने बताए ।

स्याङ्जा विरुवा गाउपालिका १ मा जन्मिएका उनको २०७५ भाद्र ३ गते २२ वर्षको उमेरमा असामयिक निधन भएको थियो । स्व.खड्का राष्ट्रिय भलिबल खेलाडी समेत हुन । स्थानिय, क्षेत्रीय हुँदै राष्ट्रिय भलिबल प्रतियोगिता समेत खेलेका उनी राष्ट्रिय टोलीबाट समेत खेल्ने सम्भावना बोकेका खेलाडी थिए ।