पोखरा (हाम्रो खेलकुद) – प्रथम टाइगर कप आमन्त्रण खुल्ला महिला तथा पुरुष भलिबल च्याम्पियनसिपको महिलातर्फको उपाधिका लागि आज शनिबार दुई विभागीय टोली नेपाल पुलिस क्लब र नेपाल एपिएफ क्लबबीच प्रतिस्पर्धा हुदैछ ।

खेल दिउँसो १२ बजे पोखरा रंगशालास्थित भलिबल कोर्टमा हुनेछ । लिग चरणको पाएको जितलाई निरन्तरता दिदै पुलिस वर्षको पहिलो उपाधि जित्ने दाउमा हुनेछ । पुलिसले लिग चरणमा एपिएफमाथि ३–० को सोझो सेटमा जित निकालेको थियो ।

कोरोना महामारी अघि पुलिसले गत वर्ष फागुनमा नेपालगन्जमा भएको प्रधानमन्त्री कप भलिबलमा एपिएफलाई हराउदै उपाधि जितेको थियो । उक्त प्रतियोगिता र कोरोनापछि भएको यो नै पहिलो ठुलो प्रतियोगिता हो ।

टोलीमा कप्तान कोपिला उप्रेती, कमला पुन, उषा भण्डारी, कामना विष्ट, मनिषा चौधरी, शान्तिकला तामाङ, कोपिला राना र पुनम चन्दलगायतको खेलाडीको साथ रहेको छ ।

यता, एपिएफ पनि लिग चरणमा भोगेको हारको बदला लिदै वर्षको पहिलो उपाधि जित्ने लक्ष्यमा हुनेछ । प्रतियोगितामा कमजोर सुरुवात गरेपनि लय समातेको एपिएफसँग सरस्वती चौधरी, रेश्मा भण्डारी, बिनिता बुढाथोकी, हीरा केसी, उषा विष्ट, निरुता ठगुन्ना, रस्मिता दुरा, यमुना रसाइली, मनिषा तामाङ र पुजा चौधरीको साथ रहेको छ ।

राउन्ड रोविन लिगमा पुलिस ३ खेलबाट ६ अंक जोडेर शीर्षस्थानमा रहेर फाइनलमा प्रवेश गर्दा ५ अंक जोडेर दोस्रो हुदै एपिएफले फाइनलमा स्थान बनाएको थियो । समान ५ अंक नै भएपनि सेटको आधारमा होङ्ग्वान्जी न्यु डायमन्ड स्पोर्ट्स क्लब तेस्रो स्थानमा रहँदै फाइनलमा पुग्नबाट बञ्चित भएको थियो ।