पोखरा (हाम्रो खेलकुद) – प्रथम टाइगर कप आमन्त्रण खुल्ला भलिबल च्याम्पियनसिपको महिलातर्फ फाइनल पुग्न राउन्ड रोविन लिगको अन्तिम खेलमा होङ्ग्वान्जी न्यु डायमन्ड स्पोर्ट्स क्लब र विभागीय नेपाल एपिएफ क्लबबीच प्रतिस्पर्धा हुदैछ ।

खेल पोखरा रंगशालास्थित भलिबल कोर्टमा दिउँसो २ः३० बजे प्रतिस्पर्धा हुदैछ । डायमन्ड अपराजित रहँदै शीर्षस्थानमा रहेर फाइनल पुग्ने दाउमा हनेछ । डायमन्डले दुई खेलबाट ५ अंक जोडेको छ ।

डायमन्डले आर्मीसँग एक अंक गुमाउदा पुलिसविरुद्ध ३ अंक जोडेको थियो । डायमन्डलाई फाइनल पुग्न एपिएफविरुद्ध एक सेट जित हात पारेपनि पर्याप्त हुनेछ । एपिएफलाई भने ३–० को सोझो सेटमा जित आवश्यक छ ।

तर, तुलनात्मक रुपमा कमजोर प्रदर्शन गरिरहेको एपिएफलाई डायमन्डविरुद्ध जित निकाल्न कठिन हुनेछ । टोलीका भरपर्दा खेलाडी सरस्वती चौधरी, रेश्मा भण्डारी, निरुता ठगुन्ना, कप्तान बिनिता बुढाथोकीले स्वभाविक खेल पस्कन सकेको छैन ।

यता, एक वर्षपछि कोटमा फर्किएको प्रतिभा माली सम्मिलित डायमन्डले आर्मीसँग संघर्ष गरेपनि प्रतियोगितामा उच्च प्रदर्शन गरिरहेको पुलिसलाई हराउन सफल भएको थियो । टोलीसँग राष्ट्रिय टोलीका कप्तान समेत रहेका अरुणा शाही, कप्तान ललितानाथ र सलिना श्रेष्ठको साथ रहेको छ ।

पुलिस तीन खेलबाट ६ अंक जोडेर फाइनलमा पुगिसकेको छ । फाइनल शनिबार दिउँसो १२ बजे हुनेछ ।