चितवन (हाम्रो खेलकुद) – एनआरएन दुवईका शाहिल चन्द चितवनमा जारी सर्वाधिक पुरस्कार राशीको प्रथम प्रधानमन्त्री कप राष्ट्रब्यापी ब्याडमिन्टन प्रतियोगितामा दोहोरो जित निकाल्न सफल भएका छन् ।

चन्दले छात्र यु–१७ तर्फ गुल्मीका मनोज पोदारलाई २१–१३ र २१–१३ को समान अन्तरले पराजित गर्दै दोश्रो चरण प्रवेश गरे । यस्तै उनले पुरुष एकलमा पनि जित निकाले । चन्दले पुरुष एकलमा काठमाडौंका भबिश थापालाई २१–९ र २४–२२ ले पराजित गर्दै दोश्रो चरणमा स्थान बनाएका हुन् ।

यस्तै पुरुष एकलतर्फ जित निकाल्ने क्रममा सेनाका हिमाल चन्द, पविन लिनथेप, नवलपरासीका रोशन कुमाल, एपिएफका प्रियान्सु सिंह क्षेत्री, साईनोका अभिषेक बोस, एपिएफका सुमन लिम्बु, सुर्खेतका नरेन्द्र बम, बाराका रामकृष्ण श्रेष्ठ दोश्रो चरण यात्र तय गर्दा सेनाका आयुष्मान नागरी, र बाँकेका इरफान अन्सारीले वाकओभर पाए ।

यस्तै छात्र एकलतर्फ कैलालीका रोसन साउद, सुर्खेतका प्रकाश अधिकारी, चितवनका लामा छिरिङ, बुटवल ब्याडमिन्टन क्लबका कृष नेपाल र कैलालीका पारस उपाध्यायले पनि दोश्रो चरण प्रवेश गर्ने क्रममा जित निकाले ।

प्रतियोगिताको बागमती प्रदेश प्रमुख बिष्णु प्रसाईले एक कार्यक्रम विच प्रतियोगिताको उद्घाटन गरेका थिए । चितवन जिल्ला ब्याडमिन्टन संघ र हरिलाल धर्मदेवी स्मृती ट्रष्टको संयुक्त आयोजना भएको प्रतियोगितामा नेपाली सेनाको त्रिभुवन आर्मी क्लब र एपिएफ क्लब, २७ जिल्ला तथा अन्य क्लबगरि २५२ खेलाडीहरुले सहभागिता जनाएका छन् ।

पुरुष एकल र राष्ट्रिय २० बरियताको युगल, राष्ट्रिय २० बरियता बाहेककाको युगल, महिला एकल, छात्र र छात्रा यु १७, पुरुष भेट्रान्स ४५ बर्ष माथी र ५५ बर्ष माथी गरि ८ स्पर्धामा प्रतिस्पर्धा गराईएको छ । महिला तथा पुरुष एकल स्पर्धाका बिजेताले नगद १ लाख १५ हजार प्राप्त गर्नेछन् । यस्तै दोश्रोले ५५ हजार र तेश्रो हुने दुईले १५ । १५ हजारका दरले प्राप्त गर्नेछन् ।