भैरब एफसी सैनामैना मेयरकपको क्वाटरफाइनलमा

बुटवल (हाम्रो खेलकुद) – भैरव एफसी नवलपरासी रुपन्देहीको सैनामैना जारी तेस्रो मेयरकप फुटबल प्रतियोगिताको क्वाटरफाइनलमा प्रवेश गरेको छ ।

सोमबार भएको खेलमा भैरब एफसी नवलपरासीले चापाकोट युनाइटेडलाई २–१ ले पराजित गर्दै अन्तिम आठको यात्रा तय गरेको हो ।

सैनामैना नगरको आयोजना तथा जनप्रिय स्पोर्टिङ युवा क्लबको व्यवस्थापनमा स्थानीय सरस्वती माध्यमिक विद्यालयको खेलमैदानमा जारी प्रतियोगितामा भैरब एफसीको जितमा रोशन रानाले दुई गोल गरे । चापाकोटका डोना थापाले गोल गरेपनि हार टार्न सकेन ।

खेलको १३औं मिनेटमा रोशन रानाले गोल गर्दै भैरवलाई १–० ले अघि बढाए । ४९औं मिनेटमा डोना थापाले पेनाल्टीमार्फत गोल गर्दै खेललाई १–१ गोलको बराबरीमा ल्याए । ७५औं मिनेटमा रोशन रानाले गोल गर्दै भैरवलाई २–१ को जित दिलाए । भैरबका रोशन म्यान अफ दि म्याच घोषित भए ।

प्रतियोगितामा मंगलबार नव कञ्चन एफसी र मुर्गिया एफसी सुर्योदयका बीच प्रतिस्पर्धा हुने आयोजकले जनाएको छ । प्रतियोगितामा विजेताले २ लाख २२ हजार २२२ नगद राशीसहित ट्रफि र मेडल प्राप्त गर्नेछ ।

दोस्रो हुनेले १ लाख ११ हजार १११ रुपैयाँ नगद प्राप्त गर्ने छ । यसैगरी विधागत रुपमा समेत उत्कृष्ट खेलाडीहरुलाई पुरस्कार वितरण गरिने आयोजकले जनाएको छ ।