पोखरा (हाम्रो खेलकुद) – टाइगर ग्रुप अफ पोखराको आयोजनामा आमन्त्रण राष्ट्रिय महिला तथा पुरुष क्लब भलिबल प्रतियोगिताको तयारी अन्तिम चरणमा पुगेको छ ।

राउन्ड रोविनको आधारमा खेलाइने प्रतियोगितामा पुरुषतर्फ चार र महिलातर्फ चार टिमको सहभागिता रहने शनिबार आयोजित अन्तिम पत्रकार सम्मेलनमा आयोजकले जानकारी दियो । ग्रुपका अध्यक्ष नारायण प्रसाद शर्माले ग्रुपमा अधिकांश भलिबलसँग सम्बन्धित पदाधिकारी र राष्ट्रिय खेल भलिबल भएकाले पहिलो पटक भलिबल प्रतियोगिता आयोजना गर्न लागेको बताए ।

‘हाम्रो यो पहिलो प्रयास हो । हामीले यो प्रतियोगितालाई निरन्तरता दिनेछौं र आगामी दिनमा अन्य खेललाई समेत समावेश गराउने छौं,’ उनले भने । प्रतियोगिताको लागि मञ्च व्यवस्थापन तथा अस्थायी प्यारापिट समेत तयार भइसकेको छ । यस्तै टिकट शुल्कमा भने वृद्धहरुलाई छुट दिइएको छ ।

महिला तर्फ सशस्त्र प्रहरी बल, त्रिभुवन आर्मी क्लब, नेपाल प्रहरी र न्यु डायमण्ड एकेडेमी । पुरुष तर्फ सशस्त्र प्रहरी बल,त्रिभुवन आर्मी क्ल्ब, नेपाल प्रहरी र गण्डकी प्रदेश रहेका छन् । प्रतियोगिताको विजेताले समान एक लाख ५० हजार तथा उपविजेताले समान ७५ हजार प्राप्त गर्नेछन् ।

तेस्रो हुनेले समान ३५-३५ हजार रुपैयाँको साथमा ट्रफी, मेडल र प्रमाणपत्र प्राप्त गर्नेछन । प्रतियोगिताको सान्त्वना टिमले १५ हजार रुपैयाँ प्राप्त गर्नेछन् । त्यस्तै सर्वोत्कृष्ट खेलाडीले २० हजार तथा उत्कृष्ट सर्भर,सेटर,ब्लकर,डिफेन्डर र स्पाइकरले समान ५–५ हजार रुपैयाँ प्राप्त गर्नेछन् ।

प्रतियोगिताको सबै खेलको प्रत्यक्ष प्रसारण हाम्रो खेलकुद डट कमले गर्दैछ ।