काठमाडौं (हाम्रो खेलकुद) – १३औं दक्षिण एसियाली खेलकुद (साग) की स्वर्ण विजेता पर्वाती गुरुङले प्रथम नेपाल ओपन अन्तर्राष्ट्रिय भर्चुअल तेक्वान्दो प्रतियोगिताको पहिलो दिन महिला पुम्सेको १८–३० वर्षमा स्वर्ण जितेकी छन् ।

पार्वतीले ६.८० अंक जोडिन् । इरानकी मार्याम दोश्रो तथा इरानकी सेयेदेह र मकाउकी ला हियो तोङ तेश्रो भए । सोही स्पर्धाको पुरुषमा इरानका हेसेयम अल्होई ७.६५ अंकसाथ पहिलो भए । मकाउका तोङ हाउ पान दोश्रो तथा मकाउकै लि झी पेङ र नेपालका १३औं सागका कांस्य विजेता जितबहादुर बोट तेश्रो बने ।

महिला पुम्सेको ४० वर्षमुनि मकाउकी जुस्तिना लेइले शीर्ष स्थान कब्जा गरिन् । जुस्तिनाले ७.५० अंक जोडिन् । १३ औं सागकी दोहोरो स्वर्ण विजेता आयशा शाक्य ६.८५ अंकसाथ दोश्रो स्थानमा सीमित भइन् । इरानकी महबौबेह हसनी र नेपालकी रेखमाया गुरुङले तेश्रो स्थानमा चित्त बुझाए ।

महिला पुम्सेको ५० वर्षमुनि भेनेन्जुएलाकी जेनिफर गार्सिया पहिलो भइन् । जेनिफरले ६.९६ अंक प्राप्त गरिन् । इरानकी जेनियब नाजेर दोश्रो तथा नेपालकी विमला भण्डारी तेश्रो स्थानमा रहे

पुम्सेकै पुरुष ६० वर्षमुनि इरानका युसोफ (७.१३ अंक) तथा महिला ६० वर्षमुनि इरानकै सयेद जाहरा (६.३३ अंक) ले स्वर्ण जिते ।

प्रतियोगितामा पुम्से, हाइ स्पिड किक र पारा तेक्वान्दोमा प्रतिस्पर्धा भइरहेको प्रतियोगिता संयोजक समेत रहेका तेक्वान्दोका मुख्य प्रशिक्षक नवीनकुमार श्रेष्ठले जनाएका छन् । पुम्मेमा ६० र हाइ स्पिड किकमा ३० गरी ९० स्पर्धा समावेश छन् ।

प्रतियोगितामा विभिन्न ३१ राष्ट्रका १ हजार ३ सय १५ खेलाडीको सहभागिता रहेको प्रतियोगिता आयोजक समितिका सचिव अशोक खड्काले जानकारी दिए ।

प्रतियोगिताको उत्कृष्ट पुरुष÷महिला खेलाडीले समान १–१ सय अमेरिकी डलर नगद पुरस्कार पाउने छन् । मोस्ट पपुलर प्लेयर खेलाडीलाई १ सय ५० अमेरिकी डलरबाट पुरस्कृत गरिने छ ।

कोटेश्वर तेक्वान्दो डोजाङ, मूलपानी तेक्वान्दो डोजाङ, काभ्रेस्थली तेक्वान्दो डोजाङ, स्युचाटार तेक्वान्दो डोजाङ, बाल गीताञ्जली स्कुल र मोर्निङ ग्लोरी स्कुलको संयुक्त आयोजनामा प्रथम नेपाल ओपन अन्तर्राष्ट्रिय भर्चुअल तेक्वान्दो प्रतियोगिताको युवा तथा खेलकुद मन्त्री दावा तामाङले एक कार्यक्रमबीच उद्घाटन गरे ।