पोखरा (हाम्रो खेलकुद) – नेपाली राष्ट्रिय महिला भलिबल टोलीकी कप्तान अरुणा शाही पोखराको ज्ञानुबाबा माध्यमिक विद्यालयमा सम्मानित भएकी छन् ।

एनएसजेएफ पल्सर स्पोर्टस अवार्डमा ‘टिम अफ दि इयर’ की कप्तान अरुणालाई अवार्डको अर्काे लोकप्रिय विधा पिपल्स च्वाइस विधामा विजेता बन्न सफल भएकोमा सम्मानित गरेको हो ।

गत पुस २८ गते भएको अवार्ड कार्यक्रममा अरुणाले करातेका मन्डेकाजी श्रेष्ठ, बास्केटबलकी सदिना श्रेष्ठ, पौडीकी गौरिका सिंह र फुटबलकी सावित्रा भण्डारीलाई पछि पार्दै अवार्ड जितेकी थिइन् । अरुणाले कुल ३७.५२५ प्रतिशत मत पाएकी थिइन् ।

अरुणालाई नेपाल भलिवल टिमकी पूर्व उपकप्तान समेत रहेकी मञ्जु गुरुङले सम्मान गरिन् । अरुणाको सम्मानमा गुरुङले आफ्नो आमा भिमसुवा गुरुङलाई लिएर ज्ञानुबाबा पुगेकी थिइन् ।

अरुणालाई विद्यालयका प्राचार्य शुभकन्य गुरुङ, अध्यक्ष कृष्ण बहादुर गुरुङ, अक्षयकोष दाता कुमारी खड्गी, अभिभावक, शिक्षक र विद्यार्थीलगायतले सम्मानित गरेका थिए ।

महिला भलिवलमा ज्ञानुबाबाको उत्पादन रहेका मञ्जु र अरुणा दुवैले एनएसजेफ पिपल्स च्वाइस अवार्ड जितेका छन् । मञ्जुले २०६५ सालमा यो अवार्ड जितेकी थिइन् । महिला भलिबल खेलाडीको उत्पादनको थलाको रुपमा रहेको ज्ञानुबाबा पछिल्लो समय भलिबलमा सक्रिय रहेको छैन ।

विद्यालयले वोलाएर सम्मान गरेकोमा धन्यवाद व्यक्त गर्दै अरुणाले आफू अझै भलिवल खेलमा प्रतिवद्ध भएर अघि बढ्ने बताइन । अरुणाको सम्मान कार्यक्रमपछि ज्ञानुबाबाले महिला भलिबल पुनः शुरु गर्ने बताएको छ ।