पोखरा (हाम्रो खेलकुद) – पश्चिमाञ्चल क्षेत्रीय भलिबल संघ र कास्की जिल्ला भलिबल संघले अरुणा शाही जिताउ अभियानको आयव्यय सार्वजनिक गर्दै बचत भएको रकम अरुणालाई हस्तान्तरण गरेको छ ।

नेपाल भलिवल संघका सल्लाहकार एवम् पोखरा महानगरपालिकाका वरिष्ठ कानुनी अधिकृत नारायण प्रसाद शर्माले अभियानबाट कुल १६ लाख ७३ हजार ७ सय पाँच रुपैयाँ संकलन भएको र बचत भएको ३ लाख ७३ हजार ७ सय ५ रुपैयाँ अरुणालाई हस्तान्तरण गरे ।

पोखरा रंगशालामा दुई दिन भएको भलिबल प्रतियोगितामा टिकट बिक्रिबाट २ लाख ५३ हजार गरी कुल १६ लाख ७३ हजार ७ सय पाँच रुपैयाँ संकलन हुदा इसेवा भोटिङमा १० लाख, भलिवल खेल व्यवस्थापनमा २ लाख ७० हजार र अन्य खर्च गरि कुल १३ लाख खर्च भएको र ८१ हजार ७ सय ५ रुपैयाँ संकलन हुन बाँकी रहेको बताए ।

यस्तै गण्डकी प्रदेश सरकारले कप्तान अरुणालाई पोखरामा एक कार्यक्रमकाबीच प्रोत्साहान स्वरुप नगद १ लाख रुपैयाँ प्रदान गरेको छ । अरुणालाई गण्डकी प्रदेश सामाजिक बिकास मन्त्री नरदेवी पुनले १ लाख रुपैयाको चेक हस्तान्तरण गरिन् ।

अरुणा नेपाल खेलकुद पत्रकार मञ्चद्धारा आयोजित पल्सर स्पोर्ट्स अवार्ड अन्तरगत पिपल्स च्वाइस विधाको विजेता बन्न सफल भएकी थिइन् । यस्तै उनकै कप्तानीमा रहेको नेपाली महिला राष्ट्रिय टोली ‘टिम अफ दि इयर’ घोषणा भएको थियो ।

पुस २८ गते भएको अवार्ड कार्यक्रममा कप्तान अरुणाले करातेका मण्डेकाजी श्रेष्ठ, बास्केटबलकी सदिना श्रेष्ठ, पौडीकी गौरिका सिंह र फुटबलकी सावित्रा भण्डारीलाई उछिन्दै अवार्ड जितेकी हुन् ।

अरुणाले ३७.५२५ प्रतिशत मत प्राप्त गर्दा मन्डेकाजी श्रेष्ठ २८.४५७ प्रतिशत मतसहित दोस्रो स्थानमा रहे । तेस्रो स्थानमा रहेकी सदिनाले १३.४९९ प्रतिशत, चोथोमा गौरिका १३.३०९ प्रतिशत तथा पाँचौमा रहेकी सावित्राले ७.२१८ प्रतिशत मत पाइन् ।

अरुणाले पल्सर स्पोर्टस अवार्ड जस्तो गरिमा बोकेको अवार्ड जिताउन सबैले खेलेको भूमिका र सद्भावका लागि आभार व्यक्त गर्दै यो जित आफ्नो मात्रै नभई सबै भलिवल खेलप्रेमीको रहेको बताइन् ।

पश्चिमाञ्चलभलिबल संघका अध्यक्ष छ्याम बहादुर थापा, डिवी नेपाली, कास्की जिल्ला भलिबल संघका अध्यक्ष भिम पराजुली लगायतले अभियान सफल पार्न देश विदेशवाट सहयोग गर्ने सवैमा आभार व्यक्त गरे ।

तस्बिरहरु– सुदर्शन रञ्जित