काठमाडौं (हाम्रो खेलकुद) – राष्ट्रिय च्याम्पियन विभागीय त्रिभुवन आर्मी क्लबका रत्नजित तामाङ र युवा स्टार सिल्क ग्रुपका प्रिन्स दाहाल १०औं संस्करणको योनेक्स सनराईज पुष्पलाल स्मृति राष्ट्रिय र्‍याङकिङ ब्याडमिन्टन प्रतियोगिताको सेमिफाइनलमा भिड्ने भएका छन् ।

अर्काे सेमिफाइनलमा दोस्रो वरियताका एपिएफका दिपेश धामीले आर्मीका प्रफुल महर्जनसँग प्रतिस्पर्धा गर्नेछ । गोलबजार कभर्डहलमा शुक्रबार भएको क्वाटरफाइनलमा रत्नले भोजपुरका विकास श्रेष्ठलाई २१–१८ र २१–१८ को सोझो सेटमा पराजित गर्दै अन्तिम चारमा स्थान बनाए ।

प्रिन्सले आर्मीका नविन श्रेष्ठलाई २१–११ र २१–१७ को सोझो सेटमा हराउदै सेमिफाइनलमा रत्नसँग भेट पक्का गरेका हुन् । प्रिन्सले गत महिना सिन्धुपाल्चोकमा भएको राष्ट्रिय प्रतियोगिताको सेमिफाइनलमा रत्नलाई हराउदै फाइनल पनि जित्न सफल भएका थिए।

यस्तै आर्मीका प्रफुलले एपिएफका गौतम कठायतलाई ९–२१, २१–१६ र २१–१३ को सेटमा जित निकाल्दै सेमिफाइनलमा एपिएफका दिपेश धामीसँगको भेट पक्का गरे । दिपेशले आर्मीका रुकेश महर्जनलाई २१–१३ र २१–९ ले पराजित गरे ।

महिलाको शीर्ष १२ तर्फ भोजपुरकी नङ्शलदेवी तामाङ एपिएफकी शोभा गौचनलाई २१–६ र २१–१५ ले पराजित गर्दै अन्तिम चारमा स्थान बनाइन् । उनले अब सेमिफाइनलमा जेशिका गुरुङको सामना गर्नेछिन् । एपिएफकी जेशिकाले आफ्नै क्लबकी सुनैना मुखियालाई २१–९ र २१–१७ को सेटमा पन्छाईन् ।

यस्तै आर्मीकी रशिला महर्जनले बिराट ब्याडमिन्टन क्लबकी सिमा राजबंशीलाई २१–१७, २१–७ को सोझो सेटमा हराउदै आर्मीकै अमिता गिरीसँगको भेट पक्का गरिन् । अमिताले आर्मीकै अनुमाया राईलाई २१–१६, २१–९ को सेटमा हराएकी थिइन् ।

पुरुषतर्फको शीर्ष १६ बाहेकको पुरुष एकल प्रतिस्पर्धाको प्रि–क्वाटरफाइनलमा सेनाका पविन लिनथेप, डेभिड थापामगर, कैलालीका देवराज राना, कञ्चनपुरका बिवेक चौधरी, सेनाका सन्तोष पनेरु, एपिएफका ईन्द्रबहादुर महता, सेनाका दिवश शंकर र सेनाका आयुष्मान नागरीले अन्तिम आठमा पुग्न सफल भए ।

महिलातर्फ खोटाङकी रेनुका राई, बाँकेकी समिक्षा न्यौपाने, बिराट ब्याडमिन्टन क्लबका रोज पाण्डे र कञ्चनपुरकी अस्मिता सुनारले पनि अन्तिम ८ मा स्थान बनाउन सफल भएका छन् । यस्तै झपाकी अन्जना राई, एपिएफकी प्रेक्षा राई र खोटाङकी स्मिता राईले अन्तिम आठको यात्रा तय गर्दा कैलालीकी प्रार्थना देउवा वाई पाएर सिधै क्वाटरफाईनल प्रवेश गर्न सफल भइन् ।