काठमाडौं (हाम्रो खेलकुद) – आठौं पर्वतीय खेलकुद महोत्सव फागुन तेस्रो साता आयोजना हुने भएको छ । आयोजक माउन्टेन स्पोर्टस फेडेरेसनले सोमबार पत्रकार सम्मेलन गर्दै महोत्सव फागुन २० गतेबाट शुरु हुने जानकारी गराएको हो ।

गण्डकी प्रदेशमा आयोजना हुने महोत्सवमा विभिन्न १५ खेलहरुको प्रतियोगिता हुने फेडेरेसनले जनाएको छ । महोत्सवमा परम्परागत आर्चरी, ठेलो, क्यानोनिङ, रक क्लाइम्बिङ, क्यानोइङ, साइक्लिङ, प्याराग्लाइडिङ, क्रस कन्ट्री रनिङ, मोटर स्पोर्टस, टग अफ वार, रिङ रेस्लिङ, घोडा दौड, ट्राइयाथलन, गल्फ, स्केट वोर्डिङ लगाएतका १५ खेलहरु हुनेछ ।

महोत्सवका लागि सम्बन्धित खेल संघका प्रतिनिधि सम्मिलित १७ सदस्यिय व्यवस्थापन समिती गठन समेत आयोजकले जनाएको छ । फेडेरेसनका प्रदेश संयोजक समेत रहेका गण्डकी प्रदेशका सांसद इन्द्रधारा विष्टसहितको ६ सदस्यिय सचिवलायको कार्यदल गठन गरिएको हो । सदस्यमा लक्की क्षेत्री, बसन्त दवाडी, केशव पाठक, दिपक बहादुर गोदार र प्रतिमा गैरे रहेका छन् ।

होत्सवले कोभिड–१९ले तहस नहस बनाएको पर्यटन क्षेत्रलाई अघि बढाउन थप सहयोग पुग्ने र माउन्टेन स्पोर्टस खेललाई शुरुवात गर्न मद्धत पुग्ने आयोजकले जनाएको छ । नेपालमा परम्परागत, सहासिक तथा पर्यटकिय खेलकुदको माध्यमद्वारा दिगो पर्यटनको प्रवर्द्धन गर्ने उद्देश्यले माउन्टेन स्पोर्टस फेडेरेशन सन् २०१३ मा गठन भएको थियो ।

स्थापनाकाल देखि नै नेपाललाई माउन्टेन स्पोर्टस हवको रुपमा स्थापित गर्न महासंघ प्रयासरत छ । महोत्सव आयोजनाका लागि १ करोड ८८ लाख अनुमानित खर्च राष्ट्रिय खेलकुद परिषद, गण्डकी प्रदेश सरकार, स्थानिय सरकार र प्रायोजक संस्थाहरुवाट सहयोग प्राप्त हुने फेडेरेसनले जनाएको छ ।