काठमाडौं (हाम्रो खेलकुद) – पाँचौ संस्करणको झिल्टुङ क्रस कन्ट्री दौड माघ दोस्रो साता नुवाकोटमा आयोजना हुने भएको छ ।

आयोजक बेलकोटगढी नगरपालिका वडा नम्वर ५ ले राजधानीमा पत्रकार सम्मेलनको आयोजना गर्दै पाँचौ संस्करणको च्याम्पियनसिप १० माघमा हुने दौडको संयोजक तथा पूर्व धावक मोहन नेपालले जानकारी गराए ।

‘जे गरौं गज्जबले गरौं’ भन्ने नाराका साथ हुन लागेको उक्त रेसमा १३.४ किलोमिटरको महिला र पुरुष दौड र ४.५ किलोमिटरको रन फर फन रेस हुनेछ । नुवाकोटस्थित कोल्पुटारबाट सुरु हुने रेस कोल्फुटार, बेलिनि, राजओडार, माझगाउँ, लामाचौर हुँदै कोल्पुरटारमा पुगेर सकिनेछ ।

मुख्य विधा १३.४ को महिला र पुरुष विजेताले समान १५ हजार, दोस्रो हुनेले १० तथा तेस्रो हुनेले ५ हजार नगद पाउँनेछन् । १३.४ किलोमिटरमा विगतको कोर्स रेकर्ड बनाउनेलाई थप ५–५ हजार प्रदान गरिने आयोजकले जनाएको छ । पुरुषमा किरणसिंह बोगटी र महिलामा पुष्पा भण्डारीको नाममा कीर्तिमान रहेको छ ।

४.५ किलोमिटरको छात्र र छात्रा विजेताले समान ५ हजार, दोस्रोले ३ हजार र तेस्रो हुनेले २ हजार रुपैया हात पार्नेछन् । च्याम्पियनसिपको पहिलो संस्करणमा पुरुषतर्फ होमलाल श्रेष्ठ र महिलातर्फ सन्तोषी श्रेष्ठ, दोस्रो संस्करणमा पुरुषतर्फ भुमिराज राई र महिलामा कान्छीमाया कोजु, तेस्रोमा किरण सिंह बोगटी र पुष्पा भण्डारी र चौथोमा कास राई र प्रिया राई कोजु च्याम्पियन बनेकी थिइन् ।