एजेन्सी – खराव समयबाट गुज्रिरहेको प्रिमियर लिग प्रतिद्धन्द्धी आर्सनललाई हराउदै म्यानचेस्टर सिटी इएफएल कपको सेमिफाइनलमा प्रवेश गरेको छ ।

सिटीले आर्सनललाई उसकै मैदानका ४–१ को हार चखाउदै अन्तिम चारको यात्रा तय गरेको हो । इमिरेट्स स्टेडियममा मंगलबार राति भएको खेलमा सिटीको जितमा गाब्रियल जेसस, रियाद महारेज, फिल फोडेन र एमेरिक लापोर्टेले गोल गरे । घरेलु टोलीका एलेसान्द्र लाकाजेटले गरेको गोल सान्त्वना बन्यो ।

खेलको तेस्रो मिनेटमा नै ओलेक्सान्डर जिनचेन्कोको पासमा जेससले गोल गर्दै सिटीलाई अग्रता दिलाएका थिए । ३२औं मिनेटमा लाकाजेटले गाब्रियल मार्टिनेलीको पासमा गोल गर्दै खेललाई १–१ गोलको बराबरीमा ल्याएका थिए ।

तर, आर्सनलले दोस्रो हाफमा सिटीको आक्रमणलाई रोक्न सकेन । ५५औं मिनेटमा रियाद महारेजले गोल गर्दै सिटीलाई खेलमा २–१ ले अघि बढाए । ५९औं मिनेटमा फर्नाडिन्होको पासमा फोडेनले गोल गर्दै सिटीलाई सहज जिततर्फ अग्रसर गराए ।

७३औं मिनेटमा फोडेनको पासमा एमेरिक लापोर्टेले गोल गर्दै सिटीलाई ४–१ को सहज जित दिलाए । अर्काे खेलमा न्युक्यासल युनाइटेड च्याम्पियनसिप क्लब ब्रेन्टफोर्डसँग १–० ले स्तब्ध हुदै क्वाटरफाइनलबाट बाहिरिएको छ । योसुवा डा सिल्भाले ६६औं मिनेटमा गरेको गोल ब्रेन्टफोर्डको जितमा पर्याप्त बन्यो ।

अर्काे क्वाटरफाइनलमा आज राति स्टोक सिटी र टोटेनहम तथा एभर्टन र म्यानचेस्टर युनाइटेडबीच प्रतिस्पर्धा हुदैछ ।