काठमाडौं (हाम्रो खेलकुद) – सेनाका प्रफुल महर्जन र रुकेश महर्जनको जोडीले प्रथम सैनामैना खुल्ला राष्ट्रिय ब्याडिमिन्टन प्रतियोगिता अन्तरगतको पुरुष डबल्सतर्फको उपाधि जितेका छन् ।

आइतबार भएको फाइनलमा प्रफुल र रुकेशको जोडीले पुलिसका जीवन आचार्य र सुनिल जोशीको जोडीलाई २–० को सोझो सेटमा पराजित गर्दै उपाधि जितेका हुन् । प्रफुल र रुकेशको जोडीले २१–१६ र २१–१६ को सहज जित हात पारे ।

सेनाका दिवश शंकर र भोज बहादुर गुरुङको जोडी र बुटवल ब्याडमिन्टन क्लबका बिश्वास नेपाल र गणेश रायमाझीको जोडीले तेस्रो स्थान हासिल गरे ।

भेट्रान ४५ वर्षमाथि चितवनका कमल राना र बुद्धि चौधरीको जोडी पहिलो भए । यि जोडीले गुल्मीका नवराज श्रेष्ठ र कृष्णा रानाको जोडीलाई २१–११, १८–२१ र २१–१० ले हराउन सफल भए । चन्द्रागिरी ब्याडमिटन क्लबका हरि खत्री र पुरन श्रेष्ठको जोडी र बुटवल ब्याडमिन्टन क्लबका अर्जुन कार्की र गोपाल टन्डन तेस्रो भए ।

योनेक्सको माभिस–३५० नाइलन सटलकक प्रयोग गरिएको प्रतियोगितामा दाङका हिमांशु कुँवर प्रतियोगिताको उदियमान खेलाडी घोषित भए ।

पुरुष डबल्सको विजेता प्रफुल र रुकेशको जोडीले ५१ हजार रुपैया हात पारे । दोस्रो भएको जीवन र सुनिलको जोडीले ३५ हजार तथा तेस्रो हुने टोलीले २० हजार रुपैया हात पारे । यस्तै भेट्रानतर्फको विजेताले ३० हजार, दोस्रोले २० हजार तथा तेस्रो हुनेले १५ हजार रुपैया हात पार्नेछ ।

विजयी खेलाडीलाई राष्ट्रिय खेलकुद परिषद (राखेप) का बोर्ड सदस्य तथा नेपाल ब्याडमिन्टन संघका उपाध्यक्ष सुभास श्रेष्ठले नगद पुरस्कार, मेडल र ट्रफी प्रदान गरे ।

रुपन्देहीस्थित सैनामैना नगरपालिकाको सैनामैना ब्याडमिन्टन क्लबको आयोजनामा भएको प्रतियोगितामा पुरुष डबल्स र भेट्रान्स डबल्स ४५ वर्षमाथि गरी दुई विधामा प्रतिस्पर्धा भएको थियो । दुवै विधामा ३१–३१ जोडीले प्रतिस्पर्धा गरेका थिए ।