काठमाडौं (हाम्रो खेलकुद) – एसियाली खेलकुद २०३० को आयोजना गर्ने आफ्नो देशको दाबीमा सहयोग गर्न नेपालका लागि साउदी अरेबियाका राजदुत मुसाउद अल आरवेले शनिबार नेपाल ओलम्पिक कमिटी (एनओसी) लाई अनुरोध गरेका छन् ।

राजदूत मुसाउद अल आरवे २०३० को एसियाली खेलकुद आयोजनाको दाबीका विषयमा एनओसी अध्यक्षसँग छलफल गर्न शनिबार सातदोबाटोस्थित एनओसी कार्यालय पुगेका थिए । एक घण्टाभन्दा लामो समय भएको छलफलमा राजदूत मुसाउद अल आरवे र एनओसी अध्यक्ष श्रेष्ठबीच खेलकुदको माध्यमबाट पारस्परिक सहयोगका विषयमा कुराकानी भएको थियो ।

साउदी अरेबियाको राजधानी रियादले सन् २०३० को एसियाली खेलकुद आयोजनाका लागि ओलम्पिक काउन्सिल अझ एसिया (ओसिए)मा दाबी प्रस्ताव पेश गरेको छ । त्यही प्रस्तावमा नेपालको समर्थन तथा सहयोगका लागि राजदूत आरवेले अध्यक्ष श्रेष्ठसँग भेट गरेका हुन् ।

२०३० को एसियाली खेलकुद आयोजनका लागि रियादसँगै कतारको दोहाले पनि दाबी गरेको छ । आफ्नो दाबीमा सहयोग गर्नका लागि अनुरोध गर्न यसअघि कतारी ओलम्पिक कमिटीको टोलीले पनि एनओसी अध्यक्षसँग भेट गरेको थियो । एनओसी अध्यक्ष श्रेष्ठले साउदी र कतारका प्रस्ताव तुलनात्मक रूपमा समान रहेको बताउँदै यसबारे ओमानको मस्कटमा हुने एसियाली ओलम्पिक कमिटीको साधारण सभामा दुवै पक्षसँग थप छलफल हुने बताए ।

अध्यक्ष श्रेष्ठले अन्तिम निर्णय गर्दा नेपाली खेलकुद र खेलाडीको हित र स्वार्थलाई केन्द्रमा राखिने बताए । मस्कटमा हुने ओसिएको साधारण सभामा अध्यक्ष श्रेष्ठसँगै महासचिव निलेन्द्रराज श्रेष्ठले पनि भाग लिनेछन् ।