काठमाडौं (हाम्रो खेलकुद) – रुपन्देहीको सैनामैनामा दुईदिने प्रथम सैनामैना राष्ट्रिय खुल्ला पुरुष डबल्स तथा भेट्रान ब्याडमिन्टन प्रतियोगिता आयोजना हुने भएको छ ।

सैनामैना ब्याडमिन्टन क्लबले पहिलोपटक प्रतियोगिता आयोजना गर्न लागेको प्रतियोगिता शनिबार र आइतबार हुनेछ । प्रतियोगितामा विभाागीय टोली, विभिनन जिल्ला तथा क्लबका खेलाडीहरुले सहभागिता रहनेछ ।

प्रतियोगितामा योनेक्सको माभिस–३५० नाइलन सटलकक प्रयोग हुनेछ । प्रतियोगितामा नेपालका राष्ट्रिय स्तरका वरीयता प्राप्त खेलाडीको सहभागिता रहनेछ ।

प्रतियोगिताको पुरुष डबल्सको विजेताले ५१ हजार रुपैया हात पार्नेछ । दोस्रो हुने टोलीले ३५ हजार तथा तेस्रो हुने टोलीले २० हजार रुपैया हात पार्ने आयोजकले जनाएको छ । यस्तै भेट्रानतर्फको विजेताले ३० हजार, दोस्रोले २० हजार तथा तेस्रो हुनेले १५ हजार रुप्रया हात पार्नेछ ।

२०७६ मा स्थापना भएको सैनामैना क्लबले १ करोड ३१ लाख रुपैयाको लगानीमा आफ्नै कभर्डहल निर्माण गरेको छ । खेल सोही कभर्डहलमा हुनेछ ।

सैनामैना नगरपालिकाको १ करोड ८ लाख, जिल्ला खेलकुद बिकास समितिको १० लाख, जिल्ला बिकास समितिको १० लाख तथा जनश्रमदानबाट ३ लाख लगानीमा हलको निर्माण गरिएको छ । ४ हजार ३ सय १० मिटर स्क्वायर फिटमा फैलिएको कभर्डहलमा २ कोर्ट रहेका छन् ।