काठमाडौं (हाम्रो खेलकुद) – नेपाली ब्याडमिन्टनका युवा स्टार तथा सिल्क ग्रुपका प्रिन्स दाहाल तेश्रो चौतारा साँगाचोकगढी मेयर कप तथा प्रथम तोप –२१ ब्याडमिन्टन प्रतियोगिताको राष्ट्रिय स्तरिय पुरुष एकलको क्वाटरफाइनलमा प्रवेश गरेका छन् ।

बुधबार भएको प्रि–क्वाटरफाइनलमा सेनाका गोकुल जोरालाई २१–७ र २१–९ को सोझो सेटमा पराजित गर्दै प्रिन्सले अन्तिम आठको यात्रा तय गरेका हुन् । अब प्रिन्सले क्वाटरफाइनलमा सेनाकै पविन लिनथेपसँग प्रतिस्पर्धा गर्नेछन् ।

पविनले रामेछापका टिकाराम मगरलाई २१–४ र २१–६ ले पराजित गर्दै क्वाटरफाइनल प्रवेश गरेका हुन् । नेपाल पुलिसका जीवन आचार्यले सिन्धुपाल्चोकका अभिषेक गुरुङलाई २१–१३ र २१–१० ले पराजित गर्दै क्वाटरफाइनलमा सेनाका रत्नजित तामाङसँगको भेट पक्का गरेका हुन् । रत्नजित वाई पाएर सिदै क्वाटरफाइनल प्रवेश गरेका थिए ।

चौतारा साँगाचोकगढी नगरपालिकाको प्रायोजन तथा तोप –२१को आयोजनामा भएको प्रतियोगिता अन्तरगत बुधबार भएको अन्य खेलमा सेनाका प्रफुल महर्जन, नविन श्रेष्ठ र रुकेश महर्जन तथा एपिएफका साजन कृष्ण ताम्राकारले पनि आआफ्ना प्रतिद्वन्दीलाई पराजित गर्दै अन्तिम आठमा स्थान सुरक्षित गरे ।

प्रफुलले रुपन्देहीका डेभिड थापामगर माथि २१–१२, २१–११ले, नविनले एपिएफका प्रियान्सु सिंह क्षेत्री माथि २१–१७, २१–१४ ले, रुकेशले सेनाकै आयुष्मान नागरी माथि २१–१८, २१–१६ र साजनले एपिएफका निरञ्जन देवकोटा माथि २१–९, २१–१३ को जित निकाल्दै अन्तिम आठमा स्थान बनाएको प्रतियोगिता रेफ्रि किरण कारञ्जितले बताएका छन् ।

कोरोनाका कारण प्रतियोगिताबाट बञ्चित राष्ट्रिय स्तरका खेलाडीहरुले पहिलो पटक प्रतियोगितामा सहभागिता जनाईरहेका छन् । यस प्रतियोगितामा राष्ट्रिय स्तरका १६ खेलाडीहरुको सहभागिता रहेको छ ।

राष्ट्रिय स्तरको पुरुष एकलका विजयी खेलाडीले नगद १ लाख ११ हजार १ सय ११ र उपविजेताले ५५ हजार ५ सय ५५ प्राप्त गर्ने छन् । ब्याडमिन्टनको ईतिहासमा यती ठुलो रकमको पुरस्कार रहेको यो पहिलो हो । यस्तै सेमिफाईनलिष्ट दुई जनाले जनही १०÷१० हजार प्राप्त गर्नेछन् ।