काठमाडौं (हाम्रो खेलकुद) – त्रिपुरासुन्दरीका अभिषेक गुरुङले तेश्रो चौतारा साँगाचोकगढी मेयर कप तथा प्रथम तोप –२१ ब्याडमिन्टन प्रतियोगिताको जिल्ला स्तरिय पुरुष एकलको उपाधि जित्न सफल भएका छन् ।

तोप – २१ को आयोजनामा भएको प्रतियोगिताको मंगलबार भएको फाइनलमा अभिषेकले चौताराका सुरेन्द्र श्रेष्ठलाई २१–१९ र २१–१५ ले पराजित गर्दै उपाधि जितेका हुन् । अभिषेकले जितका साथै ट्रफी, मेडल, प्रमाणपत्र र नगद ३० हजार प्राप्त गर्नेछन् । यस्तै उपविजेता सुरेन्द्रले नगद २० हजार ट्रफी, मेडल र प्रमाण पत्र प्राप्त गर्नेछन् ।

अभिषेकले बलेफीका अजय तामाङमाथि रिटायर्ड हर्टको आधारमा जित निकाल्दै फाईनल यात्रा तय गरेका थिए । यस्तै अर्को सेमिफाइनलमा चौताराका सुरेन्द्र श्रेष्ठले चौताराकै रमेश श्रेष्ठ माथि २१–१६, ११–२१, २१–१४ को जित निकाल्दै फाइनल यात्रा तय गरेका थिए ।

तेश्रो स्थान प्राप्त गरेका चौताराका रमेश श्रेष्ठ र बलेफीका अजय तामाङले जनही नगद ५ हजार प्राप्त गर्नेछन् । यस्तै पुरुष युगलतर्फ चौताराका प्रकाश श्रेष्ठ र रमेश श्रेष्ठको जोडी तथा त्रिपुरासुन्दरीका अभिषेक गुरुङ र युवराज अधिकारीको जोडी फाइनल प्रवेश गरेका छन् ।

प्रकाश र रमेशको जोडीले बलेफीका अजय तामाङ र राजकुमार तामाङको जोडीलाई २०–२२, २१–१० र २१–७ ले तथा अभिषेक र युवराजको जोडीले चौतारका सुन्दर श्रेष्ठ र कैलाश घलेको जोडीलाई २०–२२, २१–११ र २१–११ ले पराजित गर्दै उपाधि निकट पुगेका हुन् ।