काठमाडौं (हाम्रो खेलकुद) – नेपाली नेसनल भलिबल टिम फ्यान्स क्लबले चोटबाट ग्रसित भलिबल खेलाडी ओमप्रकाश परियारको उपचारको लागि झन्डै ९ लाख सहयोग रकम हस्तान्तरण गरेको छ ।

फ्यान्स क्लबले अभियानमार्फत संकलन भएको रकम तेस्रो चरणसम्ममा ओम प्रकाशलाई ८ लाख ९० हजार २ सय १२ रुपैया हस्तान्तरण गरिएको फ्यान्स क्लबका अभियन्ता लक्ष्मण काप्रीले जानकारी गराए ।

फ्यान्स क्लबले २० भदौंबाट सहयोग अभियान चलाएको थियो । शनिबार तेस्रो चरणमा १ लाख २९ हजार १ सय २० रुपैया हस्तान्तरण गरेसँगै ओमको लागि यो अभियान पनि समाप्त भएको काप्रीले जानकारी गराए ।

शनिबार तेस्रो चरणमा संकलित रकम अभियानका अर्का सदस्य तथा गण्डकी प्रदेश भलिबल टोलीका लिवेरो राजन दर्लामी मगर र भलिबल फ्यान्स क्लबका एडमिन एसिक नेपाली (जान सुन) ले अस्पतालमा पुगेर हस्तान्तरण गरेका थिए ।

फ्यान्स क्लबले पहिलो चरणमा ६ लाख ५६ हजार ९२ रुपैया र दोस्रो चरणमा रािष्ट्रय रेफ्री अनिल गुरुङले १ लाख ५ हजार रुपैया हस्तान्तरण गरिसकेको थियो । काप्रीले ओमको लागि अन्य व्यक्ति र संस्थाले अभियान चलाएर रकम संकलन गरेपनि हालसम्म बिरामीलाई नबुझाएको र छिट्टै बुझाइदिन आग्रह गरेका छन् ।

काप्रीले आगमी दिनमा पनि पिर मर्का परेका खेलाडीलाई फ्यान्स क्लबमार्फत फेरि एकजुट भएर सहयोग गर्ने बताउदै भलिबल फ्यान्स क्लबलाई आधिकारिक रुपमा दर्ता गर्न प्रक्रियामा रहेको बताएका छन् ।

गण्डकी प्रदेश प्रहरी भलिबल टिमका खेलाडी रहेका ओमप्रकाश तनहुँको देवघाटमा ड्युटी सकेर फर्कन क्रममा सडक दुर्घटनामा परि गम्भीर घाइते भएका थिए । पर्वतका ओमप्रकाश गत वर्ष १ माघमा तनहुँको देवघाटमा लाग्ने माघे संक्रान्तिको मेलाको ड्युटी सकेर फर्कने क्रममा नेपाल प्रहरी सवार गाडी दुर्घटना हुदा उनी घाइते भएका थिए ।

आर्थिक अवस्था कमजोर रहेका उनको खुट्टा र ढाडको मेरुदण्ड भाँचिएको थियो । उनको पोखरामा उपचार भइरहेको छ ।