काठमाडौं (हाम्रो खेलकुद) – सिन्धुपाल्चोकको चौतारामा ब्याडमिन्टनको इतिहासमा नै सर्वाधिक पुरस्कार राशीको ‘तेश्रो चौतारा साँगाचोकगढी मेयर कप तथा प्रथम तोप–२१ ब्याडमिन्टन प्रतियोगिता’ हुने भएको छ ।

चौतारा साँगाचोकगढी नगरपालिकाको मुख्य प्रायोजनमा हुने प्रतियोगितामा जिल्ला स्तरका लागि पुरुष एकल र युगल तथा राष्ट्रिय स्तरका लागि पुरुष एकल गरि तीन विधामा २१ मंसिरदेखि प्रतिस्पर्धा गराईने आयोजक तोप–२१ चौताराले ले जनाएको छ । पहिलो चरणमा जिल्लाका लागि पुरुष एकल र युगल तथा दोश्रो चरणमा राष्ट्रिय स्तरको पुरुष एकल प्रतियोयगता आयोजना गरिनेछ ।

जिल्लामा ब्याडमिन्टन खेलको प्रवर्धन गर्ने उद्धेश्यले आयोजना गर्न लागिएको प्रतियोगितामा खेलाडी दर्ता शुल्क १ हजार रहेको छ । राष्ट्रिय स्तरको पुरुष एकल तर्फको बिजेताले नगद १ लाख ११ हजार १ सय ११ प्राप्त गर्नेछन् ।

उपबिजेताले नगद ५५ हजार ५ सय ५५ प्राप्त गर्नेछन् । यस्तै सेमिफाइनमा पुगेकाले जनही १० हजार प्राप्त गर्नेछन् । कोरोनाको महामारीका कारण प्रतियोगितामा प्रतिस्पर्धा गर्नबाट बञ्चित रहेका राष्ट्रिय खेलाडीहरुले पहिलोपटक यती ठुलो धनराशी रहेको प्रतियोगितामा प्रतिस्पर्धा गर्नेछन् ।

यस्तै जिल्ला स्तरिय पुरुष एकलका बिजेताले ३० हजार, उपबिजेताले नगद २० हजार र सेमिफाइनलमा पराजित हुनेले जनही ५ हजार प्राप्त गर्ने छन् । युगलतर्फ बिजेता जोडीले ४० हजार, उपबिजेता जोडीले ३० हजार र सेमिफाईनलिस्ट दुई जोडीले समान ५–५ हजार रुपैया प्राप्त गर्नेछन् ।