काठमाडौं (हाम्रो खेलकुद) – कोरोना महामारीपछि आर्थिक समस्यामा परेका तथा न्युन आय भएका पाँच भलिबल खेलाडीलाई आर्थिक सहयोग प्रदान गरिएको छ ।

देश विदेशमा रहेका भलिबल प्रेमीको सहयोगबाट उठेको केही रकम खेलाडीहरुलाई सहयोग गरिएको लक्ष्मण काप्रीले जानकारी गराए । समन्वयकारी भुमिकामा गन्डकी प्रदेश तथा स्याङ्जाका भलिबल खेलाडी राजन दर्लामी मगर पनि रहेका छन् । उनीहरुलाई आइएमईमार्फत जनही ५–५ हजार रुपैया सहयोग गरिएको बताए ।

१२ महिना नै भलिबल खेलेर जीवन निर्वाह गर्ने खेलाडीहरुलाई कोरोना भाइरसो कारणले निकै असर पारेको हुदा पहिलो चरणमा पाँच खेलाडीलाई सहयोग गरिएको काप्रीले बताए । दोस्रो चरणमा पनि खेलाडीलाई सहयोग गरिने उनले बताए ।

खेलाडीहरुमा गण्डकी प्रदेश तथा म्याग्दीका सेटर सुजन चोखाल, बाग्लुङका दुर्गा बहादुर सुनार, सुदुरपश्चिम प्रदेश तथा डोटीका डम्मर राज भट्टराई, प्रदेश २ तथा जनकपुरका विनय कुमार यादव र सुदुरपश्चिम प्रदेश तथा कञ्चनपुरका माया खडायत छन् । उनीहरु सबै नेपागन्जमा सम्पन्न आठौं बृहत राष्ट्रिय खेलकुद प्रतियोगिता खेलेका थिए । डम्वरले आठौंका प्रशिक्षण दौरान चोट बोकेका थिए ।

यस्तै चोटका कारण अस्पतालमा रहेका रहेका नेपाल प्रहरीका भलिबल खेलाडी ओमप्रकाश परियारलाई दोस्रो चरणमा तिहार लगत्तै सहयोग प्रदान गरिने बताए । नेपाली नेसनल भलिबल टिम फ्यान्स क्लबको पहलमा ओमको उपचारको लागि सहयोग अभियान नै चलाइएको थियो । जसबाट पहिलो चरणमा ओमलाई गत असोजमा ६ लाख ५० हजार १ सय ६३ रुपैया हस्तान्तरण गरिसकेको छ ।