काठमाडौं (हाम्रो खेलकुद) – संयुुक्त अरब इमिरेट्स (युएई) को दुवईमा नेपाली समुदायबीचको दशै–तिहार कप ब्याडमिन्टन प्रतियोगिता सम्पन्न भएको छ ।

विनर्स स्पोर्ट्स एकेडेमी जुराफ अजमानमा शुक्रबार राति सम्पन्न खेलको लेभल ‘ए’ तर्फ सानिया चन्द र सुमन उदयको जोडीले उपाधि जितेका छन् । सानिया र सुमनको जोडीले दिपेश श्रेष्ठ र कपुर श्रेष्ठको जोडीलाई १५–८ र १५–९ को सोझो सेटमा पराजित गर्दै च्याम्पियन बन्न सफल भएको हो ।

यस्तै पुरुष लेभल ‘बी’ मा किशोर शाक्य र योगेन्द्र रानाको जोडीले बल बहादुर र रुद्र थापाको जोडीलाई १५–११ र १५–१३ ले पराजित गर्दै च्याम्पियन बने । महिला डबल्स्मा पवन माया नकर्मी र रचेल लामाको जोडीले सावित्री सिंह र सपना लामाको जोडीलाई १५–१० र १५–१० ले पराजित गर्दै पहिलो भइन् ।

नेपाल ब्याडमिन्टन कम्युनिटी युएई र नेपाली समाज युएईको सयुक्त आयोजनामा भएको प्रतियोगितामा पुरुष डबल्स लेभल ‘ए’ र लेभल ‘बी’ मा ४६ जना तथा महिला डबल्समा ६ जना खेलाडीको सहभागिता रहेको थियो ।

लेभल ‘ए’ को विजेताले १० हजार तथा दोस्रो भएको जोडीले समान ७–७ हजार नेपाली रुपैया हात पारे । महिलातर्फको विजेताले ६ हजार रुपैया हात पारिन् । प्रतियगितामा महिलातर्फ सानिया चन्द र पुरुषतर्फ साहिल चन्द इमार्जिङ खेलाडी घोषित भए । उनीहरुले ट्रफी र प्रमाणपत्र प्राप्त गरे ।

नेपाली समाजका अध्यक्ष गोबिन्द ढकाल र नेपाली समाजमा आवद्ध अन्य जिल्ला संस्थाका अध्यक्ष तथा एनआरएन युवा संयोजक मदन अधिकारीलगायतले खेलाडीलाई पुरस्कृत गरेको संयोजक हिरा लाल श्रेष्ठले जानकारी गराए ।

हिरालाल श्रेष्ठ, ज्ञानुमाया बराल र सुमन उदय टिमले खेलको व्यवस्थापन गर्दा रिया मनि ट्रान्सफरको प्रायोजन, विभिन्न व्यक्तित्व र सबै ब्याडमिन्टन खेलाडीहरुले प्रतियोगितालाई आर्थिक सहयोग गरेको थियो । ज्ञानुमाया बराल, हिरा लाल श्रेष्ठ, सुमन उदय, हिम्मत चन्द, विक्की बुढा, प्रमित उदय अनिल जोशीका टिमले अम्पायरको भुमिका निभाएका थिए ।