काठमाडौं (हाम्रो खेलकुद) – हामी नेपाली समाज युएई र नेपाली ब्याडमिन्टन समुदाय युएईको संयुक्त आयोजनामा दुवईमा पहिलोपटक दसैं–तिहार कप ब्याडमिन्टन प्रतियोगिता आयोजना हुने भएको छ ।

आयोजकले आइतबार राति खेल तालिका सार्वजनिक गर्दै प्रतियोगिताको सम्पुर्ण तयारी पुरा भएको जानकारी गराएको छ । प्रतियोगितामा ६ महिला र ४६ पुरुष खेलाडी गरी कुल ५२ खेलाडीले प्रतिस्पर्धा गर्नेछन् ।

प्रतियोगिता ६ नोभेम्वरदेखि विनर्स स्पोर्ट्स एकेडेमी जुराफ अजमानमा हुनेछ । प्रतियोगितामा पुरुष डबल्स लेभल ‘ए’, पुरुष डबल्स लेभल ‘बी’, महिला डबल्स र महिला एकल लेभल ‘ए’ स्तरको विधा समावेश गरिएको छ ।

खेलहरु ब्याडमिन्टन वल्ड फेडेरेसन (बिडब्लुएफ) को नियमभित्र रहेर हुनेछ । खेलहरु बेस्ट अफ थ्रीको आधारमा हुनेछ । प्रतियोगिताको विजेताले नगद पुरस्कारसँगै कप मेडल र प्रमाणपत्र प्राप्त गर्नेछन् ।

यस्ता खालको प्रतियोगिताले हरेक खेलाडीले आफ्नो खेलको स्तर सुधार गर्नुको साथै भावी दिनमा नेपालमा समेत खेललाई निरन्तरता दिने योजना बनाएको छ ।

यस्तै प्रतियोगिताको लागि आयोजकले खेल व्यवस्थापक तथा संयोजकमा हिरा लाल श्रेष्ठ तथा प्रतियगिता संयोजकमा सुमन उदयलाई जिम्मेवारी प्रदान गरेको छ । यस्तै हिरा लाल श्रेष्ठ, प्रमित उदय, सुमन उदय, ज्ञानु बराल, विकि बुढा, दिपेश श्रेष्ठ, राहुल श्रेष्ठ र हिम्मत चन्द समितिको सदस्य रहेका छन् ।