तासीलाई पेप्सी गल्फ उपाधि

काठमाडौं (हाम्रो खेलकुद)- पेप्सी ओपन गल्फ उपाधि तासी छिरिङले शनिबार जितेका छन् । स्टेबलफोर्डका आधारमा गोकर्ण गल्फ क्लबमा भएको खेलमा ४३ स्कोर गर्दै तासीले उपाधि जितेका हुन् ।

गोकर्ण गल्फ क्लबका अध्यक्ष सुहृद घिमिरे ४० स्कोर गर्दै दोस्रो भए । ६ वटा बर्डि प्रहार गरेका तासीले मोस्ट बर्डिजको उपाधि समेत जिते । उनले फ्रन्ट नाइनमा २३ र ब्याकनाइमा २० स्कोर गरे ।

सुहृदले फ्रन्ट नाइमा २२ र ब्याक नाइटमा १८ को स्कोर गरे । ३४ ग्रस् स्कोर गरेका तासी डोङले बेस्ट ग्रसको उपाधि जिते । ६० बर्षमाथिको सिनियरतर्फ केएनएस थापाले उपाधि हात पारे ।

२६ स्कोर गरेकी रेखा घिमिरे महिलातर्फ विजयी भइन् । अर्नव शाहले जुनियरतर्फ विजयी भए । जगदिश अधिकारीले क्लोजेस्ट टु दि पिन र जय नुगेन्टले लंगेस्ट ड्राइभ उपाधि जिते । ७६ खेलाडीको सहभागिता रहेको प्रतियोगितालाई वरुण वेभरेज नेपालले प्रायोजन गरेको थियो ।